Shillong, Naiwieng 13
U President ka United Democratic Party (UDP) u la ong ba ka Regional Democratic Alliance (RDA) ba la thaw da ka UDP bad HSPDP ka khot bad wer ruh ïa kiwei ki seng riewlum ban wan ïatreilang bad kane ka kynhun na ka bynta ka ilekshon MP ka ban wan.
“Na ka por sha ka por ngi la ju khot bad wer lang ïa kiwei ki seng riewlum kiba don ïa ki juh ki nongrim treikam ban ïatreilang kum kawei ka bor,” la ong u Bah Metbah.
Haba kylli hato ka UDP kan pan ka jingkyrshan na ka National People’s Party (NPP) kaba ïatreilang mynta ha ka sorkar, u Bah Metbah u la ong, “Haduh mynta kim pat ïakren eiei hynrei mano-mano kiba kwah ban ai ka jingkyrshan ka jong ki, ka seng ka long kaba kloi ban pdiang. Ha ka jingshisha, ka la dei ka rai jong ka seng bad kumta yn ïaid shakhmat bad kane ka rai ban ïakhun ha ka ilekshon.”
Shuh shuh na ka liang jong u nongïalam ka UDP u la pynpaw ka jingshaniah bad jingkyrmen ba ki nongshong shnong jong ka jylla kin kyrshan pura ïa ka UDP ha kane ka ilekshon MP.
Haba kylli pat ba hato kan don plie lynti ïa u MP ba mynta ka Congress, lada baroh ki seng kiba don ha ka sorkar MDA kin sei ïa la u jong u kyrtong ha ka ilekshon MP, u Bah Metbah u la ong ba kane kan dei tang ka jingpyrkhat ba ka lah ban long kumta ne ka lah ban nym long ruh hynrei ïa mynta la sngewthuh ba ki paidbah kin don sha ka liang jong ka UDP.
