Shillong, Naiwieng 13
Ki briew kiba ñiah ïa ki kali ar shaka ki la nang bteng ban buh jingma ïa ka jingim jong ki paidbah kiba ïaid lynti namar ka rukom ñiah jong ki da kaba pynher sted bad ïaid beit na kano-kano ka liang katba ki mon.
Ki jingjia ba rat bad tynrah ki ar shaka naduh ki scooty bad ki bike ïa ki briew kiba ïaid lynti ki dei kiba la jia khah-khah bad bun ki briew kiba la duh ei ïa ka jingim khlem dei por.
Wat kiba ñiah ïa kine ki ar shaka ruh ki bun bha kiba la mynsaw bad kiba la khlad na ka daw ka jingñiah khlem akor hi jong ki da kaba pynher sted bad leit rung katba na ba lait jaka wat na ka liang kaba ym dei ban rung.
Kane ka rukom leh ki briew kiba ñiah ar shaka ka la buh jingma ïa kiba ïaid ha lynti bad kiba jam na shiliang sha shiliang jong ka surok.
Dang ha kine ki khyndiat bnai, uwei u samla pule u la mynsaw jur na ka daw ka jingshah rat ha kawei ka ar shaka ha thaiñ Laitumkhrah.
Dei hadien ba jia kane ka jingshah rat u samla pule ba ki pulit ruh ki pynmih ka jingmaham tangba ki nongñiah ar shaka ki la leh biang kumjuh.
Ki don ruh shibun kiwei pat ki jingjia ba shah rat ha ki ar shaka, bad kiba shu mynsaw malu-mala ha kaba ym don kiba ujor pyrshah ïa kito kiba ñiah ar shaka.
Ka jingbun ki ar shaka khamtam ha nongbah Shillong ka long kaba la palat liam bad lada ki bor jong ka aiñ kim leh ei ei da kaba tyngeh ïa kine kiba ñiah ar shaka, un poi u pud ba kin bun sa tang ki jingjia shah tynrah bad shah pynmynsaw ha ki ar shaka.
La sakhi ba kine kiba ñiah ar shaka kim salia ban ñiah sted bad kin rung beit kat na ba lait jaka, la ka dei na ka liang kadiang ne liang kamon.
Hadien ba jia shibun ki jingjia shah rat bad shah tynrah ha ki ar shaka, ka jingkylli kaba bun ki kylli ka long, hato kine kiba ñiah ar shaka kim don jingtieng dei namarba sting ka rukom pyrkhing ki pulit?
Lada ki pulit kim leh ei ei katkum ki kyndon jong ka aiñ ïa kine ki briew kiba pynkheiñ kyndon kiba buh jingma ïa ki para briew, kin dang bun shuh ki jingjia kum kine bad bun ki briew kin mynsaw bad duh ei ka jingim.
