Shillong, Naiwieng 13
Ban khanglad ïa ki kam sniew ba har-rukom, ki pulit ka East Khasi Hills ki la maham lypa ban leh da kaba tyngeh bad kem naphang ïa kino-kino ki briew kiba rung ha khlaw Lawmali ban shong dih kyiad ne drok.
Ka kyrwoh khubor na u Superintendent of Police (City) ka East Khasi Hills Bah Vivek Syiem, ka la ong ba lada lap ïa kino kino kiba rung kulmar bad ïashong dih kyaid ne dih drok ne khaïi drok hapoh bad shabar ka khlaw Lawmali yn pynngat beit ïa ki hapoh ki kyndon ka aiñ Meghalaya Police Act bad NDPS Act.
Ïa kane ka rai la shim hadien ba la pynlong ïa ka jingïalang ha Police Reserve ha ka Lah Sngi U Blei hapdeng ka tnat Pulit bad ki Rangbah Shnong bad dkhot ki Dorbar Shnong ka Riatsamthiah, Wahingdoh, Jaïaw Shyiap, Jaïaw Mihngi bad Mawlai Phudmuri ryngkat ka jingïadon lang ki Sector Police Officer, ki in-charge ka ANTF, ki OC bad I/C jong ki thanad bad beat house ka nongbah Shillong. Ha ka kyrwoh u Bah Vivek Syiem u la ong, ka jingïalang ka la shim ïa ka rai ban nym shah shuh ïano ïano ruh ban ïashongkai ha kane ka khlaw bad lada lap ïa kino kino kiba khaïi ne dih drok ne dih kyaid, yn kem bad pynngat ïa ki ha kitei ki kyndon aiñ.
Ha kawei pat ka liang, ban tehlakam ïa ka rung ka mih jong ki briew khamtam ha ka por mynmiet, la rai ruh ban ïakren bad ka tnat Khlaw naba kane ka dang dei ka khlaw ka tnat, ba kan ker bad shna noh da ka khyrdop ban rung ban mih ha kane ka khlaw. U Bah Vivek u pyntip ba ïa kito kiba ïoh bat ba ïashong dih kyaid, dih drok ne khaïi drok hapoh ki kali harud ka surok jong kane ka khlaw, kin shah pynngat hapoh ka kyndon 110 jong ka Meghalaya Police Act bad ka NDPS Act katkum ka kam ba ki leh.
Ha kajuh ka por, ka tnat pulit ka la ai khublei ïa ki Dorbar Shnong kiba la shim ïa ka sienjam ban tehlakam lang ïa kane ka jingeh. U la pyntip ba ha kane ka jingïalang, la ïakren ruh halor ka jingjyllei bad jingkhaïi ïa u drok hapoh ka nongbah, ha kaba la ïoh ruh bun ki jingai jingmut na ki nongïalam shnong kiba la wan sha kane ka jingïalang.
