Nongpoh, Naiwieng 13
U nongmihkhmat jong ka Karbi Anglong Autonomous Council (KAAC), u Abhijit Kro, haba kren kum u kongsan ha ka sngi plie ïa ka E.K Mawlong Memorial Football Trophy 2023 ha ka Lah Sngi U Blei, u la ong ba ki jaitbynriew Khasi bad Karbi kiba shong ba sah ha ki thaiñ khappud kim dei ban ïa shoh ïa dat, hynrei ba kin ïa shongsuk shongsaiñ kum shi hynmen shipara.
Ïa ka jingïalang ban plie ïa katei ka jingïalehkai phutbol ba la pynïaid da ka Mawlasnai Sports Club la pynlong ha ka madan ïalehkai jong kane ka shnong hi.
Une u nongmihkhmat ka KAAC u la ong ruh kane ka dei ka sien kaba nyngkong ba un wan poi ha katei ka jaka ïalehkai jong ka shnong Mawlasnai bad pynpaw ïa ka jingsngewnguh sha ki nongpynïaid bad paidbah ka thaiñ Mawlasnai kiba la khot sngewbha ïa u ban wan sha katei ka lympung.
U la ong ruh ba ha kane ka thaiñ, kam ju don satia ka ïashoh ïadat hynrei ki paidbah ki shongsuk shongsaiñ wat lada ka don ka jingïakynad pud hapdeng ka jylla Meghalaya bad Assam.
Lah ban kdew ba ka Mawlasnai ka dei kawei na ki lynti ban poi sha ki shnong kiba hap ha kata ka Block-II kaba long kawei na ki jaka ba ïakajia pud hapdeng ka Meghalaya bad Assam la da ki phew snem mynta. Hynrei ka jingïapynbeit ïa u pud u sam hapdeng kine ki ar jylla ha Block-II ka dang ïaid haduh mynta.
