Shillong, Naiwieng 13
Ka jingïakhih sangeh treikam ba khlem buh por jong ka JAC ba kynthup ïa ka NEHUTA, NEHUNSA bad NEH USU kaba la sdang ha ka Lah Sngi U Blei ka la long kaba ïaid beit ïaid ryntih ha kaba baroh ki dkhot jong kitei lai tylli seng ki la ïashim bynta.
“Kane ka rai ngi shim namar ngi la ïohi ba une u Vice-Chancellor (VC), Prof. P.S. Shukla um shimkhia.
U thoh laiphew jait ha kot khubor, u khot ïakren, tangba ïalade um don shane naba u shim shuti,” ong u Shongknor ka JAC, Prof. Lakhon Kma haba kren sha ki lad pathai khubor.
U Prof. Kma haba pynkynmaw ba wat hadien ba ka komiti ka la phah ïa ki jingthoh, pynlong jingïalang bad ïakynduh ruh ïa ki lad pathai khubor, utei u briew (Prof Shukla) um sngewthuh satia ba ka kamram kum u VC u dei ban don ha skulbah khnang ban pynbeit ïa baroh ki kynrum-kynram.
“Ngi sngewkmen ba kane ka jingïakhih sangeh treikam ba khlem buh por jong ngi ka la long kaba jop mynta ka sngi namar 100% khlem don ba shim klas, ki nonghikai ki la ïasnohktilang bad ngi, ym don ki samla pule kiba pyrshah, ki ‘test’ ba buh mynta ka sngi ruh la rah noh kham shadien namar ki samla ki sngewthuh ba ki nonghikai kin ym shim klas bad ma ki ruh ki sngewthuh ïa ka jingeh,” ong u Shongknor.
U la ïathuh ruh ba ki dkhot ka JAC ki la ïaid ha kylleng ka skulbah bad sakhi ba baroh ki kamra klas ki la thylli lut, kata naduh ka tnad pule Social Science, Technology, Law, Science bad kiwei-kiwei.
“Ngi lap ba baroh ki kamra ki thylli lut namar ki samla pule ki sngewthuh ba ka jingïakhih ka JAC ka don ïa ka nongrim bad ka dei na bynta ka jingbha jong ka skulbah, hynrei kumba ngi la kren kum ka JAC, ngin khmih bniah man ka sngi ïa kane,” u la ong.
U la ong ruh ba haba phai sha ka ‘Administrative Block’ ym shym la don nongtrei ba wan, hynrei tang katto-katne ki bym hap hapoh ka NEHUNSA, katba ki dkhot ka NEHUNSA, 100% naduh kiba trei ha Library bad kiwei-kiwei ki la ïashim bynta lang baroh.
Na ka liang u Prof. Kma u la pynsngew ruh ba watla ka JAC ka sngewthuh ba ka don ka jingduhnong khyndiat ïa ki samla pule, hynrei kane kan long ka jingthut kaba tang shi por bad lehse kan wanrah pat ïa ka jingmyntoi ha ki por ban wan hapoh NEHU.
Haba kdew ba mynta baroh ka shong ha u VC, u la ong, “Une u VC um shimkhia ïa ka kam. Lada dei uno-uno u VC bad u ïohi kat kane ka jingïakhih kaba ktah ïa ka pule-puthi, nga tharai ba lada dei ba u shim shuti ruh, u la wanphai mardor ban ïapynbeit bad ngi, hynrei u shu heh nia tang ha kot khubor, u ong ba donkam ban kren hynrei u briew pat um don shane.”
“Kane ka pynpaw ba une u briew um long uba biang ban shong ha katei ka shuki tangba u ïaleh ban pyneh beit hynrei ka jingïakhih jong ngi kan dang ïaid bad ngi ngeit skhem ba lehse un da wanphai ngin lah ban pynbeit ïa kine ki kynrum-kynram tangba ki kyndon ba la buh kin long kumjuh – ïa u ‘Technical Officer’/’Senior Consultant’, u Rohit Prasad dei ban weng namar la thung ïa u khlem ki aiñ ki kanun bad u (VC) la pynkhleiñ lut ïa ki aiñ jong ka UGC bad NEHU,” u la ong.
Shuh shuh u la bynrap ba lada u VC u wanphai bad weng ïa utei u briew, lehse ka jingïakren kan sa ïaid shakhmat namar ka thup jingdawa jong ka JAC ka long kaba jrong.
“Ngi kwah ka jingkular na u ba u dei ban pynbeit ba hapoh katto-katne por yn pyndep ïa kita-kita ki jingdawa,” la ong u Shongknor.