Shillong, Naiwieng 13
Ka tnat Food Civil Supplies and Consumer Affairs jong ka sorkar jylla ka la mih shakhmat ban kyntu bad pynsngewthuh ïa ki paidbah ïa ka jingdonkam ban pynïasoh ïa ka Adhaar bad ka Ration Card ban lait na kino kino ki jingeh hadien habud.
Haba kren sha ki lad pathai khubor ha Shillong Press Club ha ka Lah Sngi U Blei, u Myntri ka tnat Food Civil Supplies and Consumer Affairs, u Bah Comingone Ymbon ha ryngkat bad u Commissioner & Secretary ka tnad, u Pravin Bakshi, u la ong ba da kaba pynïasoh ïa ka Ration Card bad ka Adhaar Card kan pyllait na ka jingleh thok bad ban pynlong ruh ba kiba dei ban ïoh jingmyntoi kin ym shah knieh beiñ ïa ka hok jong ki bad kane kan long ka jingmyntoi ïa ki paidbah hi.
U la ong ba ka tnad mynta u snem ka ïaleh ban ai ka jingshakri kaba paka tam ïa ki paidbah bad ban lah ban ïakhun ïa ka jingbym ïoh bam lane ka “Zero Hunger”.
“Kaba kongsan jong kane ka jingïalap ka dei ban pynsngewthuh paidbah ïa ka hok jong ki paidbah bad ngi khot bad wer ïa ki paidbah ba kin ïatreilang bad ngi ban pynduhnoh ïa ka jingbym ïoh bam khnang ban ïakhun bad ka jingduk”, la ong u Myntri.
U Myntri u la pyntip ruh ba ka skhim One Nation One Ration Card (ONORC) kan dei ka bynta kaba kongsan tam jong ka National Food Security Act (NFSA). Kane ka jingpynsngewthuh paidbah ba ki dei ban pynïasoh ïa ka Adhaar Card bad u nombar phone jong ki bad ka Ration Card.
“Kane ka jingtreikam kan pynïoh ïa ka hok kaba ka ïing ka sem ka dei ban ïoh na ka tnad”, la ong u Myntri.
U la bynrap ruh da kaba ong ba ki paidbah ki dei ban ïoh ïa u khaw ba bha uba ka sorkar ka la mang na ka bynta jong ki. Lada ki ïoh ïa u khaw uba sniew ki dei ban ujor khnang ba ka sorkar kan lah ban leh ïa kaba donkam bad u la ban jur ïa ki paidbah ba kim dei ban tieng ban pynïasoh ïa u Adhaar Card bad ka Ration Card.
