Shillong, Naiwieng:
Ka Ryndia, kaba dei ka jaiñ kup tynrai ka jaitbynriew Khasi na ka bynta ki shynrang, ka dang ap mynta ban ïoh ïa ka ‘Geographical Indication (GI) tag’ kum ka jingithuh ïa ka jinglong tynrai haba pynmih ïa ka jaiñ na kane ka Jylla.
Ka ‘GI tag’ ka dei ka dak kaba ju buh ha kino kino ki tiar kiba don la ka jong ka tynrai haba ïadei bad jingshna lane haba pynmih ïa ki tiar.
Ka Ryndia ka dei ka jaiñ kaba kyrpang kaba ju pyndonkam da ki rangbah ha kino kino ki sngi khraw kum ki jingrakhe, jingïalang bad haba don ki kam kiba kham kyrpang ha ïing ha sem.
U Commissioner and Secretary ka tnat Textiles ka Sorkar Jylla, u Bah FR Kharkongor u la ong ba da ka jingkyrshan jong ka tnat Textiles ka Sorkar Jylla na ka liang u President ka Ryndia Producers Organisation u la dep phah jingthoh na ka bynta ban ïoh ïa ka ‘GI tag’ na ka bynta ka Ryndia ha kaba la phah ïa kane sha ki bor ba dei peit ïa ka GI.
La ong ba ïa ka jingthoh kaba la phah, la dep ban pdiang bad ïa ka sngi ban sngap ïa ki jingpynsngew (hearing), dang ap ban ïoh ïa ka jingbuh tarik.
Kum shu pynkynmaw, ka Ryndia ka dei ka jaiñ kup tynrai u Khasi kaba la thaiñ da kaba pyndonkam ïa u ksai Ryndia uba mih na kane ka Jylla khamtam ha Ri Bhoi District bad kiwei kiwei ki jaka.
