Shillong, Naiwieng:
Ka sorkar jylla lyngba ka tnad Arts & Culture kan sa pynlong ïa ka prokram Janajatiya Gourav Divas ha ki ar sngi lynter ka ban sa sdang ha ka 15 tarik u Naiwieng 2023, ban ïasnoh kti lang bad baroh kawei ka ri ha ka ban rakhe bad kynmaw burom ïa ki jingnoh synñiang bapher bapher jong ki riewïaleh laitluid kiba dei ki riewlum bad kumjuh ban batai khyndiat khynsoit shaphang ki khusnam kiba la ïoh ha ka jingïaid lynti jong ki paid riewlum.
Haba kren sha ki lad pathai khubor ha ka Lah Sngi U Blei, u Commissioner & Secretary jong ka tnad Arts & Culture ka Sorkar Jylla, u Bah Federick Roy Kharkongor u la ong ba ha katei ka sngi sdang yn plie ïa katei ka prokram da ka jingïaid paidbah kaba yn pynher lama da u Chief Secretary ka jylla ka ban sdang na Khyndailad bad kan kut pat ha U Soso Tham Auditorium ha kaba u Myntri ka tnad Arts & Culture, u Bah Paul Lyngdoh un long u kongsan katba u CEM ka KHADC, u Bah Pynïaid Sing Syiem un long kum u Symbud kongsan.
Nalor kata, ha katei ka sngi kan sa don ka jingkynmaw burom ïa ki lai ngut ki riewïaleh laitluid ka jylla da kaba buh syntiew ha u motdur jong ki uba don ha U Soso Tham Auditorium.
Ha katei ka sngi kin sa don ruh ki jingïadie ïa ki bam ki dih kiba la shet tynrai, ki jingshad bad ki jingtem jingput tynrai.
Shuh shuh ha katei ka sngi kan sa don ruh ka jingpynithuh kyrpang ha ryngkat ka jingai jingïarap ïa ki 6 tylli ki shnong hapoh kane ka jylla kiba la pynneh pynsah ïa la ka lariti lyngba ki sap kyrpang ba ki don.
U Bah Kharkongor u la ong ba ha ka sngi kaba ar pat ha ka jingïatreilang bad ka Sankardev College, kan sa don ka Meghalaya Dance bad ka jingshad tynrai jong ki katto ki jingshad kiba ym ju kham ju ïohi koit ha ka juk kaba mynta.
U Bah Kharkongor u la pyntip ruh ba ka tnad Arts & Culture kan sa pynlong biang ïa ka Trihills Ensemble-2 ha ki arsngi lynter ka ban sa long ha ka 24 bad ka 25 tarik u Naiwieng 2023 ka ban long kum shibynta ban pynim pynneh ïa ka riti ka dustur, ki jingshad tynrai, ki jait jingshet tynrai, ki jingrwai jingsiaw tynrai jong ki Khasi, ki Jaiñtia bad ki Garo ka ban sa pynlong hapoh U Soso Tham Auditorium ha kaba u Myntri Rangbah ka jylla, u Conrad K Sangma un long kum u Kongsan katba u Myntri ka tnad Arts and Culture, u Bah Paul Lyngdoh un long kum u Symbud kongsan.
“Ka jingthmu jong kane ka Trihills Esemble ka long ban kyntiew bad pynneh ïa ki dustur bad ki jinglong kyrpang jong ki Khasi, ki Jaiñtia bad ki Garo bad kan long ruh kum ka jingleit phai dien biang sha ki por barim bajah ha kaba kan long kum ka jingai jinghikai ïa ki khynnah bad ki briew kiba mynta ha ryngkat ka jingïalehkmen”, la ong u Bah Kharkongor.
