Shillong, Naiwieng 10
Ki ar kol ba la thep da u Shaitborlang Kharkrang ki la biang pura ban pynlong ïa ka Lamlynti FC ba kan pynliem noh ïa ka Nongkrem SC da 2-1 kol ha ka lympung ïalehkai SSA Champions Cup, ha ka sngi Ba-ar ha SSA Stadium, Polo.
Kine baroh ar ki kynhun ki la mad ïa ki jingshah rem ha ki jingïa-lehkai ba la lah hakhmat ka Mawlai SC bad ka Mawpat SC.
Ïa kine ki artylli ki kol u Shaitborlang ula ïoh ban thep ha ka minit kaba 21 bad 77, katba ïa ka shi kol na ka bynta ka Nongkrem SC ka la wan lyngba ka penalty ba la shut da u Rangky Kharjana ha ka minit ba 70.
Ha kane ka kynti jong ka jingïakhun, u Shaitborlang u la long shisha u snar ïalehkai uba ym lah ban khlem da khring bha ïa ki paid nongwan peitkai, namar ka jinglah ban lamkhmat jong u ha baroh ki bynta jong ka jingïakhun, kaba ha kum kane ka sur, u la lah ban thep ruh ïa ki kol.
Kampher watla ka Lamlynti ka dei kaba ïakhun tang ha ka kyrdan ïalehkai Third Division, hynrei ka rukom ïalehkai jong ka ha madan ka long kum ka kynhun kaba la ih bad ba la saiñ dur bha bad na ka por sha ka por ka la thaw ïa ki lad ki lynti da kumno ban lah ban ïoh pynkhih ïa ka jar.
Wat na ka liang ka Nongkrem ruh ka pyrshang ban ïai don ha ka thong jong ka jingïakhun, hynrei ka ka lad ne ka kabu ïa ka ban ïoh ban pynkhih lem ïa ka jar ka wan lyngba ka penalty, ha kaba u Rangky uba la tur shakhmat u la lah ban pynrung suk sha kol.
Ha ka sngi Balang kin don ar tylli ki jingïakhun jong ka Group-B ha kaba Sei La Sap FCC kan ïakhun pyrshah ïa ka Sohryng-kham ha ka por 12:30 mynsngi, katba ka Sanmer SC ïa ka Mawkhar ha ka por 3:45 nohphai sngi.
