Aizawl, Naiwieng 14 (UNI)
Ki Helicopter jong ki shipai Indian Air Force (IAF) ki la kit ïa ki 42 ngut ki shipai Myanmar na ka shnong Hnahlan kaba don ha Champhai distrik ha khappud Mizoram-Myanmar ha ka Sngi Ba-Ar, shi sngi hadien ba ki la wan rieh tngen sha India na ka daw jong ka jingïakynad bad ki lehnoh ha Myanmar, la ong ki tyllong khubor.
Katkum ka jingïathuh jong u President ka Village Council, kitei ki shipai Myanmar ki la wan phet sha India hadien ba ki ‘riew kieng atiar na ka kynhun Kachin Independent Army (KIA), Chin National Army (CNA), bad Chin Defence Force (CDF) ki la ïoh ban knieh ïa kawei ka ktem jong ki shipai Myanmar.
Ha ka banyngkong, ïa kitei ki shipai Myanmar la wan shaw da ki shipai Assam Rifles sha katei ka shnong hashwa ban kit ïa ki da ki Helicopter. Ki tyllong khubor ki ïathuh ba lehse ïa kitei ki shipai Myanmar la kit sha Dimapur ha Nagaland.
Lah ban kdew ba ki ‘riew kieng atiar na ka seng KIA, CNA bad CDF ki la leit thombor ïa ki ktem jong ki shipai Tatmadaw (lane ki shipai ka Myanmar) ha ka jylla Chin bad kane ka la pynlong ïa ki shipai ban wan rieh tngen noh sha Mizoram.
Na ka liang ki pulit ka thanat Zokhawthar ha Mizoram ki la bat ïa ki 39 ngut ki shipai Myanmar ha ka miet jong ka Lah Sngi U Blei katba ki la don sa lai ngut kiba la wan poi ha ka Sngi Ba-Ar.
U Lalbiakthanga Khiangte, IGP (Hqrs.) ki pulit Mizoram u la ïathuh ba ka tnat Korbar Ri jong ka Sorkar Pdeng ka la bthah ïa ka sorkar Mizoram ban aiti ïa kitei ki shipai Myanmar sha ki shipai Assam Rifles kiba dei ki shipai kiba pahara ïa u khappud Myanmar-India.
“Ka lah ban long ba ka tnat bar ri kan pynlong ïa ki jingpynkhreh ban aiti ïa kitei ki shipai Myanmar sha ka sorkar Myanmar lyngba ki shipai Assam Rifles,” la ong uwei u heh pulit.
Ka jingthombor ki ‘riew kieng atiar KIA, CNA bad CDF ïa ki ktem shipai Myanmar kiba don ha Khawmawi bad Rihkhawdar ka la wanrah ïa ka jingïap briew ha baroh arliang. Uwei u ‘riew paidbah uba dei u phet wir ha Mizoram bad hynñiew ngut ki ‘riew kieng atiar ki la duh noh ïa la ka jingim. Ki la don ruh sa 21 ngut ki ‘riew paidbah na India kiba la mynsaw bad na kine, la pynkit ïa hynñiew ngut sha Aizawl ban ïoh jingsumar.
Watla ki shipai suiñ jong ka Myanmar ki la pyrshang, hynrei ki khlem lah satia ban pyllait ïa ki shipai kiba la shah ker kut.
