Shillong, Naiwieng:
Ka rynsan ka long kaba la khreh na bynta ka Meghalaya ban pynlong ïa ka tamasa dienglieng ne ka ‘Shillong Cherry Blossom Festival 2023’ wat hapdeng ba ki surok bad ki lynti ïaid ki kdup ïa ki dienglieng kiba saw-blad (pink) bad kiba lieh.
Ki nongwan jngoh kai pyrthei na kylleng ka ri bad nabar ri kumjuh sa shisien ki phai khmat katba ka Jylla ka rakhe ïa ka jingtynnad mariang bad ka sap ka phong ha kajuh ka por ha ryngkat ki kyrteng ba paw jong ka put ka tem bad na ki karkhana pynbyrngia.
Haba kren sha ki lad pathai khubor dang shen, u Myntri ka tnad kam jngoh kai pyrthei, u Bah Paul Lyngdoh u la ong, “Kan don ka jingwan tuid kaba 30,000 ngut ki nongwan ha ka shi sngi, kaba mut ba ha kaba kut jong ka tamasa, kin sa don 1 lak ngut ki nongwan sha ka tamasa. Kumba 90% na kiba wan, la khmih lynti ba kin dei ki nongwan jngoh kai na shabar ba kynthup ïa kiba nabar Jylla bad nabar ri kumjuh.”
Ka tamasa kan wanrah ïa bun bah kiei-kiei ba kynthup ïa ka jingïakop ‘Cosplay’, jingïakop rynsan ‘thei bhabriew, jingïakop rwai, nalor kiwei-kiwei. Katei ka tamasa kan long ha RBDSA Sports Complex, Madan Kurkalang, Bhoirymbong, Ri-Bhoi District.
Ka tamasa dienglieng mynta u snem ka dei ka jingrakhe ïa ka lariti, ka sap ka phong bad ka put ka tem, bad ka kylla mynta u snem kan wanrah ruh ïa ki nongrwai ‘Pop’ kumjuh ki DJ bapher-bapher.
Ki nongïashim bynta ha ka sngi nyngkong jong ka tamasa (17 tarik Naiwieng) ki long – Sanam, Hybrid Theory, SURL, Kenny Musik, 4th Element, The Band Phantasm, DBRYN, Gwyneth, Dalariti, CYCO, Aminio, Dr. Legend, Chevinia.
Katba ki nongïashim bynta ki ban pynshongshit ha ka sngi ba-ar kin kynthup ïa u nongrwai na Amerika, ‘NE-YO’, Meba Ofilia, Pink Panda, Snow White, Rahul Rajkhowa, Street Stories – Banjop, Empirical Tribe – Tenny, Zethan, Ricaa Stella bad Banker Kharkongor.
Shuh shuh ha ka sngi kut, ki nongwan tamasa kin ïoh ban sakhi ïa u dkhot barim ka kynhun ‘Boyzone’ – Ronan Keating, Jonas Blue, Lou Majaw, Blue Temptation, Da Minot, Nokpante, Rhem, Favian, Wanjop Sohkhlet, Banrap, Youngg Nate, Meban, Quills, Lamphrang bad Toshan.
Katei ka jaka ka don ha shi lynter ka National Highway-40, ka lynti ban pynduna ïa ka jingdheng kali ha ka ‘Cherry Blossom Festival’ kan long ha shi lynter ka surok Guwahati-Shillong, Mawïong-ISBT Bypass bad Mawdiangdiang Bypass.
