Jowai, Naiwieng 14
Ka President jong ka Meghalaya ASHA Workers Union ka Kong M June Myrsing ka la khyrwit da kaba tyngeh ïa ka jingpynshai ba la pynmih paidbah na ka tnat ka koit ka khiah jong ka Sorkar Jylla halor ka jingsangeh treikam khlem buh por jong ki ASHA.
Haba kren ha ka jingïalang ha Ladthadlaboh, Jowai ha ka Sngi Ba-ar, ka Kong Myrsing ka la ong ba ka Myntri ka tnat ka koit ka khiah ka Kong Ampareen Lyngdoh ka la kyrpad ïa ki ASHA ban bteng ïa ka jingtrei ka jong ki, hynrei ka khlem ai pat ïa kano-kano ka jingpyntikna ne kular ïa ki ASHA.
Ha kaba ïadei bad ka jingkam jong u Joint Secretary ka tnat Health and Family Welfare u TG Momin ba ka tnat ka la shimkhia halor ka jingeh jong ki ASHA da kaba ka sorkar ka la pyllait bun ka pisa kaba dei na ka bynta ka jingsiew ka jong ki, ka Kong Myrsing ka la pynshai da kaba ong ba kane ka pisa ba ka sorkar ka kam ba ka la pyllait, ka dei naduh u snem 2013 bad ka jingïakhih jong ki ASHA ka dei jong u snem 2023.
“Wat kwah ban phai dien ïa ka jong u snem 2013 namar lada phaidien kan long ka jinglehraiñ ïa ka Sorkar Jylla namar kata ka pisa kaba ki pyllait ka dei ba ka sorkar ka shah ram halor ki ASHA da kaba ki khlem siew ïa ka Meghalaya ASHA Benefit Scheme (MBS) bad Meghalaya Maternity Benefit Scheme (MMBS), la ong ka Kong Myrsing.
Ha kaba ïadei bad ka jingkam jong ka sorkar ba ki ASHA kim duna ka jingïoh ïa ka 7000 haduh 8000 ha ka shibnai, ka Kong Myrsing ka la ong ba na ki hynñiew hajar arphew ngut ki ASHA ha Meghalaya tang 10 ngut ki ASHA kiba ïoh ïa kata ka 7000 haduh 8000 bad kata ruh tang shisien ha ka shisnem.
Nalorkata, ha kaba ïadei bad ka jingong jong ka sorkar ba ka la pyrshang ban pynhun ïa ka jingdawa jong ka Meghalaya ASHA Workers Union da kaba kloi ban pynmih ïa ka Mobile App ba ai kyrteng ASHA First, ka Kong Myrsing ka la ong ba ha kaba nyngkong ki ASHA ki kyntait namar kiba bun ki ASHA kim nang kumno ban kam (claim) ïa ka incentive jong ki na Apps hynrei dei lyngba ka jingïakren bad jingkyrpad lang jong ki nongïalam jong ka Union, kumta ki Asha ki kohnguh.
