Jowai, Naiwieng 14
Palat 250 ngut ki ‘riew kynthei kiba la sem lut pura da ka jaiñsem rong jngum ki la mih sha surok bah jong ka Nongbah Jowai ha ka Sngi Ba-ar ha ryngkat ka jingkynhoi dawa ïa ka sorkar jylla ban sngap ïa ki jingdawa jong ki.
Kitei ki ‘riew kynthei ki dei ki ASHA kiba la long kita ki first responders ne ki nongïarap kiba nyngkong ha ka por ba ïakhun ïa ka khlam COVID-19 bad kumta ki dei ruh ki “COVID Warriors.”
Kine ki ASHA ki la mih sha surok da ka jingïaid paidbah naduh na madan Tympang Iawmusiang Jowai lyngba ka surok bah Iawmusiang ter ter shaduh New Hills bad ki la pynkut ha madan Ladthadlaboh.
Ki la rah ki placard bad ki banner kiba la thoh ïa ki jingdawa jong ki ban pynkiew noh ïa ka bai bnai jong ki. Nalorkata, kiwei ki khubor lyngba ki jingthoh placard ki long, ‘Ngim lah shuh ban treimon sngewbha, wat iehbeiñ ïa ngi ko sorkar’, ‘MDA Government Down Down’, ‘Ia ngi phi siew 2000, phi kam pat 5000, kaba tam 3000 ka don bad no?
Don napdeng ki ASHA kiba dang don khyllung rit, ki la bah ïa la ki khyllung rit bad ïaid kjat ym duna ïa 2 kilometre tam ban pynsngew sha ka sorkar ïa ka jingdawa jong ki.
Ynda la kut ka jingïaid paidbah, ki la pynlong ïa ka jingïalang paidbah ha madan Ladthadlaboh kaba katto katne por.
Ka nongïalam jong ASHA ha Meghalaya ka Kong M June Myrsing ka la kynnoh ba ka Sorkar Jylla ka kwah ban pynïaleh thma hapdeng ki ASHA bad ki Anganwadi bad ruh ka kwah ban pynïaleh thma ïa ki ASHA bad ki bor shnong.
Katei ka nongïalam ASHA ka la kynthoh ïa ka jingkren jong ka Myntri ka koit ka khiah ka Kong Ampareen Lyngdoh, ka la ong ba ki ASHA ki wan ban ujor ïa ka jingïoh jong ki Anganwadi.
Ka Kong Myrsing ka la ong ba ka Meghalaya ASHA Workers Union kam pat ju ujor eiei ha kaba ïadei bad ki nongtrei Anganwadi namar ki sngewthuh ba kum ki ASHA ki don ka jingïatreilang bad ki Anganwadi kiba don ha ki shnong ki thaw.
“Kat da ka Myntri kaba shong ha ka shuki, ka la dei ban pyrkhat kumno ban kren ym ban pynïakhih thma ïa ki briew kiba don hapoh kajuh ka jylla bad lada ki don kino-kino ki jingïaleh ne jingeh dei ma ka kum ka Myntri ban shim ïa ka jingkitkhlieh bad ban sop lane ban tem ïa ka ding hashwa ba kan klang.
Ha kaba ïadei bad jingong ka sorkar ban ai jinghikai ha ki VHC (Village Health Council) ba kin trei ïa ka kam katba ki ASHA ki dang don ha ka jingsangeh treikam ne Strike, ka Kong Myrsing ka la ong ba ka sorkar ka la sdang ban pynïashrut ïa ki ASHA sa bad ka shnong ka thaw.
Ka la ong kam dei ka kam kaba suk ïa ki VHC ba kin lah ban leh ïa ka kam jong ki ASHA namar ïa ki ASHA la ai jinghikai da ki bun bun snem na bynta kane ka kam.
Kane ka sorkar ka la shu kren lamwir bad pyrshang ban pyntieng kohtympan ïa ka Meghalaya ASHA Workers Union, hynrei ki ASHA ka Meghalaya ki dei ki riewshlur bad lada don mano mano kiba nud ban weng ïa ki ASHA ha ka por jong ka jingïakhih ka Meghalaya ASHA Workers Union kan nym shongthait, ong ka Kong Myrsing.
Ka President ka la pynbna ruh ba ka Meghalaya ASHA Workers Union kan nym leit trei ne pyndem katba ka sorkar Jylla kam pat ai kano-kano ka jingpyntikna kaba pynhun ïa ki ASHA.
