Shillong, Naiwieng 14
Ki pulit ka East Khasi Hills bad Ri Bhoi District ki la kem ïa u President ka Ri-Bhoi Youth Organisation (RBYO), u Baïateilang Lapang halor ki jingdawa pisa na ki petrol pump, bad na ka liang u SP ka Ri-Bhoi district u la ong ba ka jingkem ïa u kam don jingïadei eiei bad ka tamasa Cherry Blossom.
Haba ki nongthoh khubor ki ïoh ban ïakren bad u SP ka Ri Bhoi u Giri Prasad u la ong ba ïa u Lapang la kem nyngkong halor ka jingdawa pisa ha Ri Bhoi bad sa kawei pat ka dei ka jingdawa pisa ha East Khasi Hills district ha kaba la don ka jingujor pyrshah ïa u ha Thanat Laban.
Kumta u la ong ba ki pulit ki kem halor ki nongrim ym ba ka don jingïadei bad ka Cherry Blossom.
Ha kawei pat ka liang, u SP bad DC ka Ri-Bhoi district, ki la ïathuh ba ka jingpynkhreh khamtam haba ïadei bad ka jingbuh ïa ki nongpahara ka la ïaid shakhmat ha kaba la don ruh ka jingïakren bad jingpynbeit lang bad ki shnong lem bad ki nongpynïaid ïa ka tamasa Cherry Blossom.
Ki SP bad DC ka Ri Bhoi bad East Khasi Hills district ki la don ruh ka jingïakynduh lang bad kiwei pat ki ophisar na ki tnat treikam bapher bapher ha Secretariat ha ka Sngi Ba-ar ban ïakren shaphang ka jingpynlong ïa ka tamasa kaba ïaid beit.
