Shillong, Naiwieng 14
U Symbud Myntri Rangbah ka jylla, Bah Prestone Tynsong u la ong ba ka Sorkar Jylla ka la dep ban bthah ïa ka tnat pulit bad kumjuh ïa ki bor pynïaid district ba kin leh da kaba tyngeh ïa kito kiba ñiah thuk-thuk ne kali khlemakor khamtam kaba lam sha ka jingjia kaba sngewsih.
Lah ban pynkynmaw ba ha ka Lah Sngi U Blei kawei ka longkmie na ka shnong Mawlai Kynton Massar ka la duh ei noh ïa la ka jong ka jingim tang na ka jingshah rat ha kawei ka thuk-thuk kaba la pynher sted ha Mawlai Mawdatbaki.
Haba kylli aïu ka sorkar kan leh halor kum kine ki jingjia, u Bah Prestone u la ong, “Nga la ïohi ïa kato ka jingjia bad ka long kaei-kaei kaba sngewsih bad ym tang kane, hynrei nga la ïohi ruh ba kum kine ki jingjia aksiden ki ju jia na kawei ka sngi sha kawei pat.”
U Symbud Myntri Rangbah uba khmih ruh ïa ka tnat Kam Pohïing ka jylla u la ong, “Nga la dep ban bthah ïa u Director General of Police (DGP) ka Jylla ban shimkhia halor kane bad ban bthah pat sha kiba hapoh ki jong u, ba kin leh da kaba tyngeh pyrshah ïa kino-kino kiba ñiah thuk-thuk ne kali khlem akor.”
U Bah Prestone u la ong ba ka tnat Pulit ka la shimkhia ruh ban tehlakam ïa ka jingpyndait ïa ki modified silencer namar ki jingsawa kiba mih na ki, ki long kum ka jingbthei u bom kaba la ktah bad pynwit ïa ki nongleit nongwan bad ruh kaba buh jingma ruh.
U Bah Prestone u la ong, halor kine kiei-kiei baroh, na ka liang jong ka sorkar ka la bthah ïa ka tnat pulit bad ki bor pynïaid district ba dei ban pynshitom da kaba tyngeh katkum ki kyndon aiñ pyrshah ïa kito kiba ñiah kali khlemakor bad buh jingma ïa ka ïaid ka ïeng jong kiwei pat.
