Shillong, Naiwieng 14
U Symbud Myntri Rangbah ka jylla, Bah Prestone Tynsong, u la lum ïa ka jingïalang bad ki ophisar kiba dei na ki tnat treikam bapher bapher ka Sorkar Jylla na ka bynta ban ïaid beit ka rukom pyntrei ïa ki projek la ka dei ki projek kiba shna thymmai kynthup ki projek kiba ïadei bad ka jingshna surok.
Haba kren sha ki lad pathai khubor hadien ka jingïalang kaba la long ha Secretariat ha ka Sngi Ba-ar ka 14 tarik Naiwieng 2023, u Bah Prestone u la ong ba ha kane ka jingïalang bad ki tnat treikam bapher bapher jong ka Sorkar Jylla, la ïakren kumno ban pynkhlaiñ ïa ka rukom treikam jong ka PWD lada long ha kaba shna thymmai ïa ki surok, ban maramot bad kiwei kiwei ki jingpyntrei.
U la ong ba kumba long mynta, ka Meghalaya ka don haduh 10 hajar KM ki surok kiba ka Sorkar Jylla ka peit lait noh jong ka National Highway Authority of India (NHAI) bad ka National Highway Infrastructure Development Corporation Limited (NHIDCL).
Kumta u la ïathuh ba shen ka Sorkar kan sa wanrah ïa ka Office Memorandum kaba don ïa ki jinglum jingtip kiba bniah kiba la dep ban ïakren katkum ka jingbatai ne Presentation kaba la pyni, khnang ban sngewthuh kino ki surok kiba la kheiñ ba ki dei ki surok bah, kino ki surok rit ne surok shnong nalor kiwei kiwei ki projek.
Kumta ha kane ka jingïalang la dep ban ïakren sani bha bad shen yn sa pynmih ïa ka Office Memorandum haba ïadei bad kane ka bynta.
Haba ïadei bad ka jingdawa jong ki paidbah ka thaiñ War Jaiñtia ban leh eiei noh ïa ka Dhar Construction Company kaba ki la kynnoh ba ka la shna torti ïa ka surok kaba tang hadien 2 bnai ba la dep shna, ka jinglong jingman jong ka surok ka la jot rathai, na ka liang U Bah Prestone u la ong ba ïa mynta ym pat lah ban ong ei ei ha kaba ïadei bad kane, hynrei yn ailad shwa ba ka kam kan ïaid bad hadien ba la ïoh lut ïa ki kaiphod, yn sa lah ban bishar namar kane ka dei ka surokbah kaba peit da ka NHAI bad ka khlem hap hapoh ka jingpeit jong ka Sorkar Jylla ha kaba ka bor ka shong ha ka NHAI.
