Shillong, Naiwieng 14
U Bah Prestone Tynsong uba dang shu shimti dang shen ïa ka kam President jong ka National People’s Party (NPP) Meghalaya u la ong ba um don jingtip eiei satia ban don ka jingpynbor na ki nongïalam ka seng ban ai tiket MP ïa u MLA barim ka Mawhati u Bah Dasakhiat Lamare ban ïakhun na Shillong Parliamentary Constituency.
“Ngam don jingtip eiei halor kata, bad ngam tip ruh naei phi ïoh ïa kata ka jingtip hynrei na ka liang jong nga, ngam tip eiei ban don kum kata,” la ong u Bah Prestone haba buh jingkylli ki lad pathai khubor ba don ka jingpynbor na ki Dhar ban ai ïa ka tiket ïakhun MP sha u Bah Dasakhiat Lamare.
Lah ban pynkynmaw ba dang shen ka la mih ka khubor ha kaba la kynnoh ba imat ka la don ka jingïapher jingmut hapdeng ki nongïalam hapoh ka seng NPP, kata hadien ba u Bah Sniawbhalang Dhar uba dei ruh u Symbud Myntri Rangbah ka jylla u la pynpaw ka jingkwah ba ka NPP kan ai tiket ïa u Bah Dasakhiat Lamare ban ïakhun ïa ka ilekshon MP.
Ha kawei pat ka khubor, une u nongïalam ka NPP ha Meghalaya u la pyntip ba ïa ki kyrteng jong ki kyrtong ban ïakhun ha ka ilekshon MP ka ban long ha u snem ban wan na Shillong bad Tura, yn sa pynbna hapoh une u bnai.
Haba kylli, u Bah Prestone u la pyntip ba haduh mynta ki la don haduh 5 ne 6 ngut kiba la wan shakhmat bad pynpaw ba ki kwah ban ïakhun ïa ka ilekshon MP na Shillong Parliamentary Constituency. Ha kaba ïadei pat bad ka Tura, u la ong ba ka MP ba mynta ka Agatha K Sangma kan dei hi ka kyrtong ban ïakhun ha ka ilekshon MP ka ban sa long.
