Shillong, Naiwieng 14
Ka Sorkar Jylla ka dang ap ïa ka jingai ktien na ka liang jong ka Hynñiewtrep National Liberation Council (HNLC) na ka bynta ban pynïaid shakhmat ïa ka jingïakren ïasuk.
Haba kren sha ki lad pathai khubor ha ka Sngi Ba-ar, u Symbud Myntri Rangbah ka jylla u Bah Prestone Tynsong u la pyntip ba mynta ka sorkar ka dang ap ïa ka jingai ktien na ka HNLC bad ruh la kyrpad ba ki nongïalam ba hakhmat ka seng kin wan noh dalade sha ka jingïakren ïasuk ban wan.
U Bah Prestone u la ong ba kumba ka long mynta na ka liang ka Sorkar Kmie bad ka Sorkar Jylla ki long kloi beit ban bteng ïa ka jingïakren bad ka HNLC, bad mynta ka sorkar ka dang ap ka jingai ktien na ka liang jong ka seng.
“Ïa mynta ngi dang ap ka jingai ktien na ka liang ka HNLC, namar haduh mynta ki nongïalam ba ha khlieh duh ka seng kim pat wan satia ban ïashim bynta ha ka jingïalang ïakren ïasuk. Kumta ngi la phah leit phai ïa ki dkhot ka seng ha ryngkat ka jingkyrpad bad ka jingkyrpad jong ngi ka long ba ynda ki la long kiba la khreh ba kin sngewbha ban pyntip sha ngi, naba ngi dang ap ban bteng biang ka jingïakren,” la ong u Bah Prestone.
U Bah Prestone u la ong, “Ka jingïakren ba pura ka dang long tang shisien bad ba kane ka jingïakren ruh ka dang dei tang ba ki dkhot ba kham hapoh ka kyrdan bad kumta ngi kyrpad ba ha ka jingïalang ban wan, la dei ban ïadon lang da ki nongïalam ba ha khlieh duh, ban ïoh pynïaid shakhmat ïa ka jingïakren lyngba ka miej ïakren ïasuk.”
