Shillong, Naiwieng 14
U President ka Khasi Student’s Union (KSU) Sengkmie Bah Lambokstarwell Marngar, u la ong ba haduh mynta ka seng kam tip kum kiei kita ki kyndon ba ka sorkar jylla ka la pynrung biang ha ka jingpynthymmai biang ïa ka Meghalaya Resident Safety & Security Act 2016.
U Bah Marngar u la ïathuh ba ka sorkar jylla ka la dep mynjur ha ïingdorbar thawaiñ ïa kane ka aiñ Meghalaya Residents Safety & Security Act 2016 hynrei haba la wan ka sorkar hapoh ka jingïalam u Conrad K Sangma ka la wanrah biang ha ïingdorbar ha u snem 2020 ban thep biang ïa ki kyndon.
U la ïathuh hadien ba la dep mynjur ha ïingdorbar, ka sorkar jylla ka la pan jingmynjur na u Lat ka jylla bad u Lat ka jylla u la pan jingmut na ka Ministry of Home Affairs ka Sorkar India.
“Ngi la ïohi ba ka Sorkar India ka la pynphai biang ïa kane ka aiñ sha ka sorkar jylla hynrei ngim pat tip pat la ka MHA ka pynphai tylli ne ka buh lang ki jingai jingmut, hynrei ïa kane ngin sa hap ban buddien” u la ong.
Nalor kane u la ïathuh ba kane ka aiñ MRSSA ka long ban tehlakam ïa ka jingwan rung kyrthep ki bar jylla ki ban wan rung hapoh ka jylla katba ka Sorkar India ka dang bishar ïa ka Inner Line Permit kaba la dep mynjur ha ïingdorbar thawaiñ ka jylla.
Haba kylli halor ki khyrdop kaba ki sengbhalang ki la dawa pynïeng ban pynlong ïa ka jaka talasi ïa kiba wan nabar ka jylla, u Bah Marngar u la ïathuh ba ha kane ka aiñ la thoh ba ki don ki jaka ban pynrung kyrteng ïa ki briew kiba wan nabar ka jylla (facility centre) kaba ka sorkar ka la dep kdew haduh 14 tylli ki jaka ha rilum Khasi bad 23 tylli ha rilum Garo.
“Haduh mynta kine ki jaka pynrung kyrteng kiba ka sorkar ka la kdew ban leit jurip ka la shu jah noh hynrei wat ka jaka rung (entry point) ha Umling mar shu plie ka la kylla jaka peit ïa kiba ngat jingpang covid hynrei mynta haba la kut u covid kam shym la treikam shuh” u la ong.
Kumta u la kyntu ïa ka sorkar jylla ba ka dei ban pyntreikam noh ïa ka MRSSA jong u snem 2016 haba la dep mynjur kum ka lad ban ïada ïa ka jingrung kyrthep ki bar jylla kat haduh ba ka Sorkar India kan da mynjur ïa ka ILP.
