Shillong Naiwieng 14
U MLA ka Mawlai konstitwensi, Bah Brightstarwell Marbañiang u la ïathuh ba u khynnah uba la tynrah ïa ka longkmie ha Mawlai Mawdatbaki ha ka janmiet jong ka 13 tarik u Naiwieng 2023, u dei uba dang don hapoh ka 18 snem ka rta hynrei u la ïoh pat ïa ka Learner’s Driving License lane ka license kaba pyni ba u dang shu sdang ban nang ñiah ïa ka thuk-thuk.
Kum ban shu pynkynmaw hangne, kawei ka longkmie kaba la tip kyrteng kum ka Kong Larisa Ïawrod kaba shong ba sah ha Kynton Massar, Block-A bad ka shnong trai ka dei na Phlangwanbroi ka la khlad noh hadien ka jingshah tynrah ha kawei ka thuk thuk ha Lad Pata ha Mawlai Mawdatbaki katba ka dang thmu ban jam sha shiliang jong ka surok.
Katei ka thuk-thuk ka dei kaba don ïa u registration number ML05-AA-6505 bad u nongñiah u la tynrah beit ïa katei ka longkmie haduh ba kan da kyllon khram ha madan ha ryngkat ka jinglyngkien ka snam.
Katkum ka jingsakhi jong ki nongleit nongwan, la ong ba katei ka longkmie ka la mynsaw jur na ki bynta jong ka khlieh bad ka khlem tip briew shuh. Kumta hadien ba la pynkit noh sha ka jaka ai jingsumar, la pynbna ba katei ka longkmie ka la khlad noh namar ka jingjur jong ka jingmynsaw.
Ïa kane u Bah Brightstarwell, u la ong haba kren sha ki lad pathai khubor ha ka Sngi Ba-ar ha Civil Hospital Shillong, ha ka jingwan sngewlem jong u ïa ki bahaïing bahasem kiba dang ap ïa ka Post Mortem jong ka Kong Larisa Ïawrod.
U Bah Brightstarwell u la pynpaw ka jingsngewsih halor katei ka jingjia bad u la ong ba kaba sngewsih kum ki nongshong shnong ka long ba kane kam dei shuh tang ka jingjia kaba dang shisien hynrei kum kine ki jingjia ki la dei kiba la jia na kawei ka por sha kawei pat.
“Ka jingñiah khlemakor khamtam kiba ñiah ïa ki ar shaka ka wanrah ïa ka jingsngewsih ïa ki longïing khamtam ïa ine i longkmie i ba sah hapoh Kynton Massar”, la ong u Bah Brightstarwell.
U Bah Brightstarwell u la ïathuh ba katei ka longkmie kaba la shah tynrah ka dei kaba don tang uwei u khun shynrang. Nangta u la ong ba kane ka jingñiah thurmur jongno-re-jongno ka wanrah ka jingduhnong bad ka jingsngewsih ïa kiba mad ha ka jingjia shah tynrah.
Na ka liang jong u kum u nongmihkhmat, u la phone ïa u Officer Incharge (OC) ba un shimkhia halor kane ka jingjia bad ha kajuh ka por mar sien tip halor katei ka jingjia, u la phah pynkit ïa katei ka longkmie sha ka jaka sumar hynrei kaba sngewsih pat ka long ba katei ka longkmie ka la khlad noh.
U Bah Brightstarwell u la ïathuh ruh ka katkum ka jingïathuh jong u Investigation Officer (IO), la ïathuh ba utei u khynnah uba tynrah ïa katei ka longkmie haduh ban da khlad u dei uba dang don hapoh ka 18 snem ka rta. Ïa mynta utei u khynnah u dang don ha along ki pulit Mawlai na bynta ka jingtohkit halor katei ka jingjia bad ruh ban tohkit ha kaba ïadei bad ka jingïoh jong u ïa ka Learner’s Driving License wat haba u dang don hapoh ka 18 snem namar ka jingïoh ïa ka laisen ka long 18 snem shaneng bad kane ka la pynlyngngoh shikatdei eh.
“Kaba sngewlyngngoh ba ngi la ïoh ban tip lyngba u Investigation Officer ka long ba une u khynnah u la don ïa ka Learner’s Driving License hynrei haba peit ha ka Learner’s Driving License pat u dang don hapoh ka 18 snem”, la ong u Bah Brighstarwell.
U Bah Brighstarwell u la ong ba u ngeit skhem ba ka aiñ kan leh ïa kaba donkam bad ban tih bniah halor ka jingduna bad ka jingbakla kaba don hangno-hangno bad kumno ba ki dang hapoh ka 18 snem ki lah ban ïoh ïa ka Learner’s Driving License.
Shuh shuh u Bah Brighstarwell u ngeit skhem ba lyngba ka tnad pulit ha ryngkat ka jingïatreilang bad ki shnong ki thaw kumno ban peit bha ïa ka jingñiah khlem pyrkhat jong ki nongñiah khamtam ki nongñiah ar shak. U la kyrpad ruh ïa ki kmie ki kpa haba ki khun ki kti ki dang hapoh ka 18 snem ba kim dei ban pynthied ne ailad ïa ki khun kiba dang khynnah ba kin ñiah ïa ki kali ne ki ar shaka namar bunsien kan ïalam sha ki jingjia kiba sngewsih.
“Ka jingkitkhlieh ka dei ruh jong ki kmie ki kpa, ngi hap ban sngewthuh ba haba ki khun ki kti jong ngi ki dang dei kiba dangrit bad ka bor jingpyrkhat jong ki kam pat kot bad ka snam ka dang shit bad ka aiñ ruh kam pat shah ïa ki ba kin ñiah la ka long da ki kali ne ar shaka, ka jingkyrpad ïa ki kmie ki kpa ka long ba nai pynshlur ïa ki khun jong ngi haba ka kyrta kam pat biang”, la ong u Bah Brightstarwell.
