Shillong, Naiwieng 15
Ka Voice of the People Party (VPP) ka la kren shai ba ka seng da lei-lei kan ym ïatreilang bad kiwei-kiwei seng saiñ pyrthei ka Jylla namar ki nongrim jong ka ki ïapher bak-ly-bak na ki.
“Ka jingkylli ban ïatreilang, ka bym lah long. Lada ïatreilang, ngin ym thaw hi ïa ka VPP,” ong u nongaiktien ka VPP, Dr. Batskhem Myrboh.
U la ong ba kumba ka long mynta, ki paidbah kim don lad shuh shano kin phai hynrei ka VPP ka ai ka lad ïa ki paidbah namar baroh ki seng ki long kumjuh haba phai sha ki kam saiñ pyrthei jong ki.
“Ka kam saiñ pyrthei jong ki ka pynmyntoi ïa ki katto-katne bad kiba ïajan bad ki hynrei ym ïa u paidbah, katba ka jong ngi ka dei ka saiñ pyrthei kaba rung sha ki tynrai bad kumta ngim lah ban ïatreilang. Lada ngi ïatreilang, ngin ym lah ban ai pat da kawei ka lad sha ki paidbah,” u la ong.
Haba kdew ba ka nongrim jong ka seng kam dei tang ban ïakhun ilekshon, u Dr. Myrboh u la ong ba ka seng ka thmu ban wanrah jingkylla katba kiwei pat ki seng ki ïakhun tang ban ïoh bor.
“Ka saiñ pyrthei jong ngi ka kham pher na kiwei namar ka dei ka saiñ pyrthei ka ban wanrah jingkylla. Ha ngi, jop ne rem, kam pher. Ban pynbor treilang bad kiwei ngim lah namar ngim lah ban ïapeiñ ïa ki nongrim,” ong u nongaiktien ka seng.
Halor ka ilekshon MDC, u la ong ba ka seng kam pat shim rai eiei halor katei ka bynta bad ka jingkhmih bniah ïa kito kiba pan tiket ban ïakhun na ka VPP ka dang ïaid.
Haba phai pat sha ka ilekshon MP, u Dr. Myrboh u la ong ba ka jingïalap ka ïaid ryngkat-ryngkat bad ka jingpynshai paidbah.
Kum ban shu kdew hangne, ka VPP ka la pynbna ïa ka kyrteng u Dr. Ricky A.J. Syngkon kum u kyrtong ka seng u ban ïa aireng ha ka ilekshon ban wan sha ka Lok Sabha.
Lah ban kdew hangne, u MLA ka UDP na Mawkyrwat, Bah Renikton Lyngdoh Tongkhar dang shen haba kylli la ka UDP kan khot ïatreilang ne em ïa ka VPP kumba ïatreilang bad ka HSPDP, u la pynpaw ka jingsngewkmen ba lada ïatreilang bad ka VPP, u kyrtong ba la pynïeng lang un ïoh ïa ka jingjop, hynrei u sngewthuh ba ka la eh ïa ka VPP ba kan ïatreilang namar ka la dep pynbna ïa u kyrtong jong ka.
