Jowai, Naiwieng 15
Ki nongtrei ASHA hapoh ka lama jong ka Meghalaya ASHA Workers Union ki la bteng ïa ka jingïakhih jong ki ha East Jaiñtia Hills District ban dawa pynkiew ïa ka bai bylla.
La sakhi ba da ki spah ngut ki nongtrei ASHA ha ryngkat ka riam da ka jaiñsem rong jngum ha ka 15 tarik Naiwieng ki la mih sha surok ryngkat ki khun rit ban ïashim bynta ha kane ka jingïakhih kaba jai-jai.
Ka jingïakhih ha Khliehriat ka la sdang na Stand Byndihati bad ïaid lynter ka surok bah Khliehriat, sha shlem treikam u DC bad DMHO bad pynkut da ka jingïalang hajan ka Khliehriat State Bank.
Ki ASHA ha katei ka sngi ha ryngkat ki jingthoh ha ki placard ki ong kumne “Wat hukum ïa ngi ban trei noh ïa ka kam, haba phi ong ngi dei ki nongtrei mon sngewbha”. Ki don ruh ki jingthoh kiba ong “Ngim lah shuh ban im tang 66 tyngka shisngi”, “Phi pynïaryngkat ïa ngi bad ki MLA, siew tulop ïa ngi kum ka tulop MLA”.
Ynda la kut ka jingïaid paidbah la pynlong ïa ka jingïalang bad ka President jong ka ASHA Khliehriat Unit ka Kong Pretty Jyrwa, kaba la ai jingkren da kaba ong wat la ka Kong Ampareen Lyngdoh ka dei ka briew kaba bat ïa ka shuki Myntri hynrei kam sngewthuh ïa ka jingeh jong ki longkmie.
Kane ka nongïalam ki ASHA na Khliehriat, ka la ong ba ka Myntri ka ong ba ki ASHA ki ïoh T.5000, bad kumta ka la kylli ïa ka Myntri ba shano jah kata ka T.3000 haba ïa ki nongtrei ASHA la siew tang T.2000 man u bnai.
