Shillong, Naiwieng 15
U Symbud Myntri Rangbah ka jylla u Bah Prestone Tynsong uba khmih ruh ïa ka tnat Kam Pohïing u la pyntip ba shen ka sorkar jylla kan sa khot ïa ka jingïalang bad baroh ki nongïalam na ki kynhun bad seng bapher bapher ban ïatai bad ïakren sani halor ka shithi jong ka Ministry of Home Affairs (MHA), kaba la pynphai ïa ka Meghalaya Residents Safety and Security Amendment Bill (MRSSAB), 2020.
Ïa kane u Bah Prestone u la pyntip ha ka Sngi Balang sha ka kynhun jong ki nongïalam ka seng Hynñiewtrep Youth Council (HYC) kiba la leit ban ïakynduh bad pan jingshai na u, halor ka jingshah pynphai jong katei ka bill 2020.
Haba kren sha ki lad pathai khubor hadien ka jingïakynduh, u President ka HYC Bah Roy Kupar Synrem u la ong ba kum ka seng ki la pan jingshai na ka sorkar halor kane ka rai jong ka MHA bad halor ka jinglong jingman jong ka MRSSAB, 2020.
“Ha kane ka jingïa-kynduh bad jingïakren, u Bah Prestone u la pyntip sha ngi ba ka MHA ka la pynphai ïa ka Bill hadien ba ka la peit bniah bad bthah ruh ïa ka sorkar jylla ba kan phai khmat biang sha ki katto katne ki kyndon kiba la bsut hapoh ka Bill,” la ong u Bah Roy.
Ka Sorkar Kmie ka don jingsngew ba kino kino ki aiñ ne kyndon ba la pyntreikam da ka Sorkar Jylla kim dei ban don jingktah ne pynthut ïa ka rung ka mih ki briew shapoh ka Jylla.
Shuh shuh u President ka HYC u la ong, “U Symbud Myntri Rangbah u la pyntip sha ka seng ba ka MHA ka don ïa ki jingsngew bym ïahap haba phai sha ka jingpynïeng ïa ki Entry-Exit Point lane ki khyrdop katkum ki kyndon ka aiñ, namar ba ki khyrdop kin pynthut ïa ki briew kiba kwah ban rung shapoh ka Jylla”.
Nalor kane, u la ong ba ka MHA ka la buh ruh ïa ka jingbthah ba kino kino ki Bill ne ki Act kiba la shna da ki Sorkar Jylla kim dei ban ïai pyrshah lane long pyrshah ïa ka Act ba la mynjur da ka Parliament.
Une u nongïalam ka HYC u la ong ba ka seng ka la kyrpad ïa u Symbud Myntri Rangbah ka Jylla ba un ai lem ïa ka kopi jong ka shithi ka MHA khnang ba ki ruh kin lah ban ai jingmut lem sha ka Sorkar.
Ha kajuh ka por, ka Sorkar Jylla ka la rai ba shen kan sa khot ïa ka jingïalang bad ki kynhun bapher bapher ban shong bishar biang ïa ka Bill bad ban pynkylla thymmai katkum ki jingbthah bad jingpynsngew jong ka MHA.
U Bah Roy Kupar u la pynpaw ba ïa mynta um kwah satia ban kynthoh tam halor ka shithi ka MHA, hynrei ka jingdawa jong ka HYC ïa u Lat ka Jylla ka long ba un ai ka jingmynjur ïa ka MRSSAB, 2020 kham kloi kat kaba lah.
