Shillong, Naiwieng 15
Ka long shisha ka khubor kaba ai mynsiem ïa kiwei pat ki longïing namar uwei u rangbah uba kyrteng Shestar Thangkhiew um ju kynhied ne kren dom ïa la ka jong ka kurim ka Esbina Kharbuki, hynrei u kren da ka ktien ja-li ja-um da kaba pyndonkam ïa ka kyntien “sngap seh ieid” lada ka kum leh bakla.
Ka dewlynnong Nongmahir ne Nongmahir Island kaba hap ïaid na Umsning ter ter shaduh Zero Point ka dei kaba hap ha Umsning Constituency, Ribhoi District. Kane ka dewlynnong ka la sdang paw pyrthei ha ki kam jngohkai ka dei namar ka jingsaphriang ka dur-khih (video) jong kine ar ngut shi kurim kiba shong ba sah ha kane ka jaka.
Ban poi sha kane ka jaka sah jong kine ar ngut shi kurim ha dewlynnong Nongmahir hap ïaid da ka lieng na Nongdiengngan kumba shi kilometer hapdeng ka um kaba la tuid na damsite kaba la dep saiñ bording.
Kane ka jaka jngohkai pyrthei ka la sdang naduh u snem 2019 hadien ba u Bah Shestar u la leit kai sha Sohra, Dawki, Mawlynnong uba la ïoh mynsiem na ki paralok ban shna kum ka jaka jngohkai namar ka jingitynnad kane ka jaka ha Nongmahir namar ka jingdon kane ka wah kaba heh kaba don haduh san tylli ki dewlynnong.
Haba u nongthoh khubor na Shillong u la poi sha Nongmahir la sngewthuh ka long shisha kaba pyngngad namar ki don ki dieng sal, la thung da ki syntiew, ka jaka ka jaka sah pyngngad kaba la shna da ki siej bad ka jaka bam khana kaba la pynkhreh kyrpang.
Haba shong ha ka lieng ka long shisha kaba pyngngad namar hapdeng jong ka um la don ki dewlynnong kiba don ki dieng ki siej bad ka jingpah sngewtynnad jong ki sim kaba long shisha kaba kynjah.
Haba ïakren bad u Bah Shester Thangkhiew, u la ïathuh hadien ba u la ïa pyrkhat shi kurim, u la sdang shwa da ka kam kaba rit ban shna pynitynnad ïa kane ka jaka ha Nongmahir da kaba thung phlang, shna ïing da ki siej kaba ki la neh mynta lai snem.
U la ïathuh ba hadien ba la saphriang ka ‘video’ ba ki tem kaitar shi kurim ki briew ki la sdang ban wan kai sha kane ka jaka kum na Israel, Germany, Assam bad napoh ka jylla.
Nalor kane, u la ïathuh ba ki briew kiba wan hangne ki lah ban wan shet da kaba siew tang ka pisa namar ki khiew ki pliang ki dieng ki la pynbiang ma ki lait noh ki mar bam ki hap wanrah hi.
“Balei nga ong, ‘Sngap seh ieid’ ïa la ka kurim namar ngam kwah ban kynhied ne kren dom ïa ka lok lajong ïoh ka thut ne ka mong noh tang namar ka jingkren jong nga, hynrei da ka jingkren ieid ka pynlong ïa ka kurim ba kin nym mong haba nga kren ïa ka, wat lada ka bakla ruh” u la ong.
U la ong ruh ba lada u kren khor ne kren tohmet wat ki briew kim sngewtynnad ban peit ïa u, hynrei lada u kren da ki ktien kiba jem ka pynlong ïa ki briew ba kin sngewtynnad.
“Ngi sah hangne ngim ju ïa dom shi lok hynrei don ki por ba ngi ïa dom tangba ngim ju ïa dom sah” u la ong.
U la ïathuh ba kane ka kaitar kaba u buh ha kane ka jaka jngohkai ka long ban tem haba baroh ar ngut shi kurim ki la dep treikam, teng teng don ka por ba tem ma u, rwai ka lok bad don ka por ba ki ïa tem lang.
Ha kajuh ka por ba ka kaitar kaba u buh ha kane ka jaka ka long ban pynsngewtynnad ïa kiba wan kai ha ka por ba ki shongkai ki lah ban pynbyrngia da kaba tem kaitar.
