Nongpoh, Naiwieng:
U Myntri ka tnat Veterinary & Animal Husbandry ka jylla u Bah A.L Hek ha ka Sngi Ba-ar u la plie paidbah ïa ka tamasa kaba hynñiew jong ka Amur Falcon Festival kaba ar sngi lynter hapoh ka shnong Tyrso ka ban pynïaid da ka Tyrso Valley Wildlife Protection Society (TVWPS) ryngkat ka jingïatreilang bad ka Seng Samla Shnong Tyrso Pyllun. Ïa kane ka tamasa la kyrshan ruh da ka Farmers Producer Cooperative Society jong ka shnong Tyrso.
Kum ban shu pyntip khyndiat, kane ka tamasa ka dei halor ka jingwan ïuh-kjat bad shongthait shipor ba shisien shisnem jong ki sim Amur Falcon, kiba dei ki sim kiba la wan na ka thaiñ Siberia jong ka ri Russia, ha shwa ba kin leit pat sha kiwei de ki jaka bad ki ri jong ka dewbah Africa.
Ka jingthmu ba kongsan ban pynlong ïa kane ka tamasa ka long ban kyntiew ïa ka kam jngohkai pyrthei ha katei ka jaka bad ruh kyrpang ban pynsngewthuh sha ki paidbah halor ka jingdonkam ban pynneh pynsah ïa ka mei mariang, ki sim ki doh, ki mrad ki mreng bad dohkha dohpnat.
Ha kane ka sngi plie paidbah ïa ka tamasa la ïadon ryngkat u Executive Engineer barim ka tnat PWD ka jylla, u Bah Ransom Sutnga, u Bah Lumlang Mawnai, Vice President ka FKJGP North Khasi Hills, u Bah Pateng Myrsing, Working President ka CoRP nalor ki nongkitkam ka TVWPS ba kynthup ïa u Bah R Sten, Chairman, u Bah Alos Nongpoh, General Secretary lem bad ki paidbah ka thaiñ.
U Bah Hek haba ai jingkren ha kane ka sngi, u la kular ban ai ka jingïatreilang ryngkat bad ki paidbah ka thaiñ ban kyntiew ïa ka kam jngohkai ha katei ka jaka da kaba ban ruh ba kum ki khun samla kiba la nang la stad jong ka thaiñ ki donkam ban tih bniah ïa ka ‘history’ jong ka jingwan ïuh-kjat ki sim Amur Falcon ha katei ka shnong ka jong ki bad ban buh ha ki jingthoh (documentation) khnang ba ka sorkar jylla ka lah ban buh ïa katei ka jaka ha ka map jong ka kam jngohkai pyrthei bad lada ki shem kano-kano ka jingeh, ki lah ban kynduh bad pan jingïarap na ka tnat Wildlife ka jylla.
Ha kane ka sngi na ka liang ka TVWPS ka la ïoh ruh ban aiti ïa ka dorkhas sha u Bah A.L Hek ban khmih bad ïarap pynbiang ïa bun ki jingduna, ki jingeh kiba ki paidbah ki ïakynduh ha ka thaiñ.
Kiwei kiba la ai jingkren ha kane ka sngi ki kynthup ïa u Bah Ransom Sutnga, u Bah Lumlang Mawnai bad u Bah Pateng Myrsing.
