Shillong, Naiwieng:
Ki nongñiah kali kamai kiba kamai na Laitumkhrah sha Polo ki la pynpaw ïa ka jingeh kaba khraw bha halor ka jingpynïaid shi lynti lane “One Way” na Polo sha Saw Furlong.
Kane ka jingphah ïaid shi lynti na Polo sha Saw Furlong ka la sdang naduh ka 6 tarik u Naiwieng 2023. Kumba la pyntip da ki bor pulit pynïaid kali la ong ba kane ka dei tang ka jingpyrshang bad kaba long tang shipor ban peit ïa ka jingdheng kali.
Haba ïoh ban ïakren bad u Bah Pynsuk Ïuroi uba dei u General Secretary ka Synjuk ki Nongñiah Taxi Sor bad Khapsor ha ka 14 tarik u Naiwieng 2023, u la pynpaw ka jingsngewkhia ha kaba ïadei bad kane ka jingpyrshang jong ka tnad pulit pynïaid kali ban pynïaid shi lynti na Polo sha Saw Furlong. Kumta u la kyntu ïa ki bor kiba dei khmih ba kin peit ïa kine ki jingeh ym tang jong ki nongñiah kali hynrei jong ki paidbah ruh kumjuh kiba shong kali.
U Bah Ïuroi u la ïathuh ba katei ka jingsdang ban pynïaid shi lynti ïa ki kali na Polo sha Saw Furlong ka la sdang naduh ka 6 tarik u Naiwieng 2023 bad kane ka la treikam la shi taïew tam eiei.
U Bah Ïuroi u la ong ba ka jingthmu jong ka tnad pulit pynïaid kali ban pyrshang ïa katei ka jingpynïaid kali shi lynti ka long ban pynduna ïa ka jingkhapngiah hapoh Polo bad u la ong ba um lah ban len ba ka jingkhapngiah hapoh Polo ka long kaba haduh katta katta hynrei kaba sngew lyngngoh ka long ba ki kali kiba wan na Saw Furlong ki la hap ban kiew beit sha ka lynti jong ka ophis Shillong Municipal Board bad ban pynïaid sha ka surok Polo Towers bad mih sha Polo bad u la ong ba katei ka surok lei ka dei kaba la jur lypa ka jingkhapngiah.
“Ki kali nangne la ñiat shuh shuh shato, ngi sngew kam don jingmut keiñ ban pynkylluid tang ïa ka Polo bad pynkhapngiah pat ïa kaba shaneng namar katei ka lynti ka dei kaba khapngiah bad kaba pynïasoh ïa shibun tylli ki shnong”, la ong u Bah Ïuroi.
U Bah Ïuroi u la pynpaw ba ka don ha ka jingduna ha ka jingdheng kali ha ki bynta ka Saw Furlong sha Polo namar ka jingphah ïaid shilynti hynrei sha kiwei pat ki bynta shaneng ka Polo Towers, ka jingdheng kali ka dang don bad ka dang jur bad ka buh jingeh ruh ïa ki paidbah khamtam kiba pang ba shitom namar ka lynti ïaid ka la jngai bad kyllaiñ palat.
Na ka liang ka kynhun ka kwah ba la kumno kumno la dei ban pyllait noh tang ïa ki kali kamai ba kin rung na katei ka surok bad hangta sa peit ka long kumno.
“Kane ka jingeh ym tang ba ka la ktah ïa ki nongniah kali kamai hynrei ka la ktah ruh ïa ki paidbah namar ki kali mynta kiba mih na Nongmensong ki hap ïaid na Pynthor ban mih sha Polo, te ki paidbah kiba sah ha Demsieñïong, Saw Furlong ter ter kumno kin ïoh kali shuh bad ki paidbah kiba mih na Laitumkhrah ruh kiba noh lyngba kane ka NEEPCO ter ter ki mih shatei, kata ka dei ka jingeh ym tang ïa ki draibar hynrei ka long ka jingeh ruh ïa ki paidbah”, la ong u Bah Îuroi.
Namar kata, na ka liang ka kynhun ka la kyntu ïa ki bor kiba dei khmih ba ki dei ban peit ba kan don ka jingpynïabiang sha baroh ki bynta jong ka sor ban lait na ka jingdheng kali ym tang ha ki bynta jong ka Polo.
