Shillong, Naiwieng:
U Deputy Commi-ssioner (DC) jong ka Ri Bhoi District u Arpit Upadhyaya u la pyntip ba na ka liang jong ka district ka la long kaba la pynkhreh ban pdiang bad pynlong ïa ka tamasa Cherry Blossom kaba lai sngi lynter ha madan Kurkalang, Bhoirym-bong.
Kane ka tamasa Cherry Blossom kaba 3 sngi lynter kan sdang naduh ka 17 tarik bad kut ha ka 19 tarik mynta u bnai. Ha kine khyndiat taïew ba la dep la sakhi ruh ba ki la mih ki kynhun bapher bapher ban pynpaw ka jingpyrshah halor ka jingpynkut ïa kane ka tamasa ha ka Sngi U Blei.
Haba kren sha ki lad pathai khubor hadien ba la wai ka jingïalang khmih bniah halor ka jingpynkhreh ïa katei ka tamasa ka ban sdang ha ka Sngi Thohdieng, u DC u la pyntip ba la pynbiang ïa ki bor pahara ban peit bad khmih ïa ka jaka rung bad jaka mih bad ruh na ka liang ki volunteer ka shnong kin ïarap lang khamtam lei ha kaba ïadei bad ki jaka pynïeng kali ban pyntikna ba ki nongwan sha kane ka tamasa kin nym mad kino-kino ki jingeh bad ktah ïa ka leit ka wan.
Ha kaba ïadei pat bad ka jingpyrshah jong ka Joint Action Committee (JAC) ïa ka jingpynkut ïa kane ka tamasa ha ka Sngi U Blei, u Superintendent of Police (SP) ka Ri-Bhoi u Giri Prasad u la pyntip ba na ka liang ka tnat ba dei khmih bad ki nongïalam shnong ki la dep ban ïakynduh ïa ki dkhot jong ka JAC bad ha kaba la lah ban pynsngewthuh sha ki, ha kaba ïadei bad ka por jong ka jingsdang ïa ka tamasa ba la rah tad ynda la wai ka jingïaseng.
Kumba long mynta, ka jylla ka la khmih lynti ba ha kane ka tamasa ka jingwan ïuh-kjat jong ki nongwan kai kan kot sha ka shi lak tam ha kine lai sngi.
