Shillong, Naiwieng:
Ka kylla ba lai jong ka ‘Shillong Literary Festival’ ka la sdang ha ka Sngi Ba-ar ha Nan Polok. Kane ka tamasa ka ban kut ha ka 16 tarik mynta u bnai ka wanrah ïa ka jingïashim bynta jong kumba 60 ngut ki nongthoh bad kan kynthup ïa palat 30 tylli ki kylla naduh ka jingïakren bad ki nongthoh, jingïathuhkhana, jingïamir jingmut, jingpyllait kot, ka ‘open mic’ bad ka jingpyni nam ïa ki dur.
Haba ai jingkren ha ka jingïalang, u Myntri ka tnad kam jngoh kai pyrthei, Bah Paul Lyngdoh u la ban jur ba ka Sorkar ka shimkhia ha ka ban thaw bun ki lad ki lynti, ki rynsan nalor kiwei-kiwei.
U la ong, “To ngin pyntikna ba ngi lah ban pynkylla ïa kaei kaba uwei u nongthoh poitri ba paw u la ong – ‘the best lack all conviction, while the worst are full of passionate intensity’. Ka la dei por ba kiba la nang la stad bad kiba la shai ba kin ym lehraiñ ban pynpaw ïa ki jingsngew jong ki halor ki mat kiba kongsan. Na bynta ka imlang-sahlang ban kiew shaphrang, nga kwah kyrpad ïa phi baroh kiba long ki nongïalam ba pyrkhat, kiba long ki briew kiba wanrah jingmyntoi, ki briew kiba lah ban kynthup bad synñiang sha ka jingkiew jong ka Jylla, ban ïasnohktilang bad pyntikna ba ki jingpyrshang jong ngi ki seisoh. Nga da ïoh mynsiem shisha; Ngan sa wan biang ha kawei na kine ki kylla ym kum u ‘riew saiñ pyrthei hynrei kum u nongthoh bad u nongthoh poitri.”
Na ka liang u Dr. Vijay Kumar D., Commissioner & Secretary ka Sorkar Jylla, u la pynpaw ka jingkyrmen ba ki tamasa bad ki kam jngoh kai kin long ka kor treikam ka ban kyntiew ïa ka Jylla, ha kajuh ka por ban pynïadon bynta ïa ki samla ha kaba kum kine ki tamasa, ki long ka lad ban pynbiang rynsan na bynta ki ‘riew don sap.
U la ong, “Ki kam jngoh kai bad ka ïoh ka kot kaba wandur ki long ka bynta ba kongsan na bynta ka jingkiew ka Jylla, da kaba buh jingmut ïa ka jinglong-jingman ki jingitynnad mariang, ki lariti mynbarim bad ka jingriewspah ha baroh ki liang. Ka thong ka long ban khring ïa kito ki briew kiba kham kyrpang, ki nongwan jngohkai pyrthei bad ki ‘riew shimet kiba lah ban kyntiew ïa ka Jylla kum kawei na ki jaka jngoh kai pyrthei kaba hakhmat eh.”
Nalor ki ‘riew pawkhmat, ki don ruh ki nongthoh ba paw kiba la wan ïashim bynta ba kynthup ïa ka Kong Janice Pariat, Rohan Chakravarty, Arghya Sengupta, Ambarish Satwik, Clemen Xavier, Parismita Singh, Naveen Kishore, Ankush Saikia, Jeyamohan, Sam Miller, Sanjoy Mukherjee, Nandini Oberoi, Bah Desmond Kharmawphlang, Bijoya Sawian, Kong Patricia Mukhim, Bah Ian Lyngdoh, bad Bah Kyntiewbor War.
