Shillong, Naiwieng 15
U Bah Embhahlang Shadap uba long u nongpynïaid ïa ka jaka pynïeng thuk-thuk naduh Motphran shaduh Bimola hadien ba u la ïohi ïa ka jingjyllei ki kam sniew khamtam ka jingshah kem jong ki nongdie drok hajan ka jaka pynïeng ar shaka ha Bimola kaba la pynïaid da ma u, u la ong ba katei ka jaka ka long kaba jur bha ka jingjyllei ki kam sniew naduh mynshwa kata hashwa ba un shimti ïa ka kam ban pynïaid ïa katei ka jaka pynïeng jong ki thuk-thuk ar shaka.
Ha kaba ïadei bad ka jingshah kem jong kawei ka briew kaba la paw ha ki dur khih ba ka dang bunkam ban pynïaid ïew ïa u drok, u Bah Embhahlang u la ong ba katei ka kynthei kaba la shah kem noh ha ki bor pulit, ka dei kaba la dep ban shah thap teng ha u mynshwa namar ba ka la wan ban die drok ha kitei ki jaka.
“Kaba sngewsih eh ka long ba naduh bym don shuh kane ka jingpynïeng thuk-thuk, ka jingshngaiñ ruh kam don shuh re hangne ki thaiñ”, la ong u Bah Embhahlang.
U Bah Embhahlang u la ïathuh ba kiba bun ki nongshong dukan ha kitei ki thaiñ baroh, ki por ba la leit ki ju khang dukan 8:30 ne 9.00 baje eiei mynmiet hynrei mynta pat ki la khang kumba 7.30 eiei namar ba kam long shngaiñ shuh ïa ki ba kin ïaid kin ïeng lyngba katei ka jaka namar ba bun eh kiba leh ïa ki kam sniew bapher bapher khamtam ka jingjyllei jong u drok ha kitei ki thaiñ.
U Bah Embhalang uba la shah pynsangeh ban pynïaid ïa ka kam jong u ban buh bad pynïaid ïa katei ka jaka pynïeng ïa ki thuk-thuk ar shaka ha katei ka jaka, u la ong ba ka jingpynsangeh kynsan jong ka Deputy Commissioner (DC) East Khasi Hills District, ka la ktah ïa ki paidbah kiba leit ba wan da ki ar shaka namar haba ki leit donkam, ki ju buh ïa ki ar shaka jong ki ha kine ki jaka pynïeng kali. Ym tang katta, ka la ktah ruh ïa ka kamai kajih jong u bad ïa ki nongtrei hynrei wat la katta ruh ka jingbym shah shuh jong ka DC ban pyndonkam ïa katei ka jaka pynïeng ïa ki thuk-thuk ar shaka, ka la wanrah pynban ïa ka jingbym shngaiñ shuh ha ka leit ka wan jong ki paidbah mynmiet-mynïong bad ruh ka jingjyllei ki kam sniew khamtam ka jingïadie bad dih drok.
“Nga mynta nga la hap shu shong kumne khlem kam khlem jam bad ka jingphah sumar ïa u khun ruh, ngam don pisa shuh re”, la ong u Bah Embhahlang.
Kumta na ka liang jong u Bah Embhah u la kyrpad ïa ka DC ba kan ailad biang ban pyndonkam ïa katei ka jaka pynïeng ïa ki thuk-thuk ar shaka khnang ba kan long ka jaka kaba shngaiñ ïa ka leit ka wan jong kiba bun balang.
“Nga kyrpad rit hakhmat ka DC ba wat long ka mawdohnud hynrei pyrkhat lem ïa ngi ki barit baria khamtam mangi kiba im jakpoh hangne. Lada phi don ka mynsiem, phi dei ban wan khmih shwa keiñ dalade ïa kane ka jaka pynïeng thuk thuk hashwa ba phin khang,” la ong u Bah Embhahlang.
