Shillong, Naiwieng 15
U MLA ka UDP na Mawkyrwat, Bah Renikton Lyngdoh u la ïathuh ba ka UDP ka dang shu dep thaw ïa ka Election Committee ba kan wad kyrtong na ka bynta ka ilekshon MDC ka ban long ha u 2024.
Haba ïakren bad u Bah Renikton u la ïathuh kiba kwah ban ïakhun ïa ka ilekshon MDC na ka tiket UDP ha Mawkyrwat konstitwensi, South West Khasi Hills District ki la don bun ngut kiba la pynpaw.
U la ïathuh ba yn tip paidbah katno ngut kiba kwah ban pan tiket ha kane ka ilekshon MDC ynda ka Election Committee ka la pynbna ban wad kyrtong.
“Haduh mynta ki la don kiba wan pynsngew sha nga tangba ngam kwah ban pynpaw kyrteng hynrei ngan shu ïathuh ba ki la don kiba kwah ban pan tiket” u la ong biang.
Kum ban shu pynkynmaw, u Bah Poland Sohphoh uba dei ophisar ba la shongthait na KHADC u la dep pynpaw ha kine ki bnai ba u kwah ban pan tiket na ka seng UDP.
Kane ka jingthaw ka UDP Mawkyrwat ïa ka Election Committee ka dei hadien namar ba ki la don bun ngut ki nongkyrshan ka UDP kiba la pynkhreh ban pan tiket hynrei kam dei kaba suk ïa u MLA ba un shim rai marwei.
Kumta ban wanrah ïa ka jingkhuid jingsuba ban ïoh ïa u kyrtong uba biang ban sei ha kane ka ilekshon MDC ka dei satang ka buit jong ka Election Committee ba kan pynbit pynbiang haduh ba ka State Election Committee kan sa pynbna paidbah.
Kum ban pynkynmaw ba ka UDP ha Mawkyrwat ka la sdang ban khlaiñ shuh shuh hadien ba la wan pynrung dkhot pura u nongïalam ka Hynñiewtrep Youth Council Bah Robertjune Kharjahrin.
U kyrtong ka UDP un hap ban ïakhun pyrshah ïa u kyrtong ka Congress Bah Carnes Sohshang uba dei lypa u MDC ba mynta bad kiwei pat ki kyrtong kum na ka NPP bad VPP.
