Shillong, Naiwieng:
Ka long shisha ka khubor kaba sngewtynnad ban tip ba u Pastor D. Tang jong ka Seventh Day Adventist Church Mukhla, West Jaiñtia Hills District u la ïoh ban pynbam smai ïa sanphew san ngut ki samla kynthei bad shynrang kiba la pyndep ïa ka jingshah hikai pyntbit kaba dei ka kynhun kaba hynriew (6th Batch) kum ki nongap pahara kaba don ha Iooksi, West Jaiñtia Hills District kaba la pynkut mynta ka sngi ka 14 tarik Naiwieng 2023.
Kane ka jaka shah hikai ap pahara ka dei kaba la tip kum ka Sub Centre Training Tornado Security Agency kaba don ha shnong Iooksi, Umdeinlin kaba hap ha Mowkaiaw constituency, West Jaiñtia Hills District kaba la long trai da u Bah Pyndap Muksor.
Ha kane ka jaka hikai ki khynnah ki wan na kylleng ki shnong jong ka Bri U Hynñiewtrep ban shah hikai na ka bynta sawphew san sngi khnang ba kin tbit ban ap pahara ha ki dukan, ki karkhana, ki shlem treikam bad kiwei de kaba ki kompeni ne riewshimet ki donkam ïa ki.
Ha kane ka sngi pynkut, la pynlong ïa ka prokram ban ai jingsneng kyntu kynpham ïa kine kiba la pyndep ïa ka jingshah hikai da u Bah P. Chullet uba long kum u Kongsan bad u Pastor D. Tang kum u symbud kongsan ha ka jingïadonlang nongkitkam ka shnong bad ki kmie ki kpa ki nongshah hikai bad ïa ka jingïalang la pynïaid da u Bah Pyndap Muksor uba dei u trai jong kane ka jaka hikai.
Na ka liang u Bah Pyndap Muksor u la pyntip ba lada don ki khynnah kiba kwah ban shah hikai pyntbit ha ka kam ap pahara kin sdang ban ai phom noh n aka bynta ka jinghikai kaba hynniew (seventh batch).
Haba ai jingkren kum u kongsan u Bah Pradip Chullet u la ong ba ka kamram jong phi kum ki nongap pahara haba phi la don ha ka kam kam dei ban ïada ïa ka jaka puta hynrei ban ïada ïa ka jingim briew ruh, ban wanrah ïa ka jingshngaiñ ha ka imlang ka sahlang.
U la ong ba ka dur ba phuh samrkhie, ka ktien kaba phi kren jai-jai kan pynkmen ïa ki briew kiba peit ïa phi, hynrei u la kyntu ba kum u briew phim dei ban don ka mynsiem kaba tlot hynrei dei ban long kiba skhem ha ka jingmut jingpyrkhat.
Katba u Pastor D.Tang u la ong haba u peit ïa ki haba ki ïeng ha madan u ïohi kum ki shipai ban wanrah ïa ka jingsuk jingshngaiñ haba phi don ha kano kano ka kam kaba phi trei nangne shakhmat.
Ha kajuh ka por u Pastor u la sneng bad kyntu ïa kine ki samla da ka ktien jong u Blei.
