Shillong, Naiwieng 15
Wat la ka don ka jingkynnoh ba ka Sorkar Jylla kam don bynta ei ei ban siew ïa ki ASHA kiba dei ki nongtrei mon sngewbha ha kylleng ki shnong ka Jylla, na ka liang ka Myntri ka tnat ka koit ka khiah, ka Kong Ampareen Lyngdoh ka la pynshai ba ki paidbah ka Jylla kim dei ban shah ïalam bakla namar ka Sorkar Jylla ka donbynta ban ai ka jingsiew kaba dei ka ‘incentive’ bad ki don ruh ki ASHA kiba ïoh kham bun katkum ka jinglah jong ki ban ai jingshakri ha kaba don ruh ki ASHA kiba ïoh haduh T. 82,000 hapdeng ki khyndiat bnai ba ki trei.
Haba kren sha ki lad pathai ha ka Sngi Balang halor ka jingïakhih ki ASHA, ka Kong Ampareen ka la ong kum ka Myntri ka khot biang ïa ki ASHA ban ïakren halor ka nongrim jong ka jingdawa jong ki bad ha kajuh ka por ka la pynshai ruh ïa ki jingkynnoh pyrshah ïa ka kum ka Myntri bad ïa ka Sorkar Jylla haba ïadei bad ki ASHA.
Haba sei ïa ki kot ki sla ban pynshisha ïa ki jingsiew kiba ki ïoh na ka Sorkar Jylla bad ruh na ka Sorkar Pdeng lyngba ka National Health Mission, ka Kong Ampareen ka ong ba ki ASHA ki ïoh ka jingsiew katkum ka jingtrei jong ki bad na ka liang ka Sorkar Jylla ruh ka donbynta ban ai ka ‘fixed incentive’ kaba 2000 sha ki ASHA bad kam dei satia kumba don ki nongkynthoh ba ka pisa kaba ïoh ki ASHA ka dei kaba wan tang na ka Sorkar Pdeng.
Ka Kong Ampareen ka la ïathuh ruh ha u snem 2021-2022, ka Sorkar Jylla ka la siew T. 16.32 klur na ka bynta ka incentive ki ASHA kaba 2000, nangta sa 53 klur kaba dei ka ‘backlog payment’ kaba sah naduh ki snem ba mynshwa, bad ka incentive na ka Sorkar Pdeng lyngba ka NHM ka long T. 21.91 klur.
Ha u snem 2022-2023, ka Kong Ampareen ka la ïathuh ba ka Sorkar Jylla ka pynlut T.16.98 klur haba ïadei bad ka fixed incentive bad ka incentive lyngba ka NHM ka long T. 22.68 klur.
Haba ai ka jingïaroh ïa ki ASHA, ka Kong Ampareen ka la ong ba ka kam jong ki ASHA ka dei ka kam kaba ki trei mon sngewbha ban saphriang ïa ka rukom ai jingsumar ïa ki nongshong shnong ba kin ïoh ka koit ka khiah kaba biang. Kumta ka jingsiew ruh ka dei katkum ka jinglah jong ki ASHA ban trei namar kam dei ka kam kaba siew tulop.
Namar kata, ka Kong Ampareen ka la ong ba lada ki ASHA ki kloi ban wan ïakren biang, ka pdiang sngewbha ban don ka jingïakynduh.
Nalor kata, kane ka Myntri ka la bthah ruh ïa ki ophisar ban pynmih ka kynja jingpynbna ka ban batai shai ïa ki kam kiba ki ASHA ki dei ban trei ym ba kin trei ïa ki kam ki bym dei ban leh namar ha man la ki shnong ki don ruh ki ANM bad ki Mid-Level Health Provider (MLHP) kiba trei ha ka liang ka koit ka khiah.
Ka Kong Ampareen ka la ong ba ha ka jingïakynduh bad ki ASHA dang shen, na ka liang ka Sorkar kan peit lang ïa ka koit ka khiah ki ASHA lyngba MHIS haba ki donkam ban ïoh jingsumar bad kan kon ruh ka policy haba ïadei bad ka jingjied ïa ki ASHA ha man la ki shnong.
Ka la ong ba lada ki ASHA ki kwah jingshai shuh shuh ka kloi ban ïakren biang bad ki, hynrei lada pan ïa kaei kaba palat pud na ka jinglah jong ka Sorkar Jylla, yn nym lah ban shu kular.
