Shillong, Naiwieng 15
Ki pulit pynïaid kali ha nongbah Shillong ki la talasi ïa ki nongñiah ar shaka ban lap ïa ki bym biang ka laisen bad ban bat ïa kiba ñiah khlemakor bad pynher sted ha surok.
Ki pulit ki la pynlong ka jingtalasi ha ki katto katne ki jaka ha nongbah Shillong khamtam hadien ba la sakhi bun ki jingjia kiba ishyrkhei ha kaba ki ar shaka ki rat ne tynrah ïa ki kali bad ïa ki briew kiba ïaid harud surok ne kiba jam na shiliang sha shiliang ka surok.
U SP (traffic) ka East Khasi Hills district, u K Prasad u la ong ba ka jingtalasi ïa ki ar shaka la leh khnang ban lap ïa kiba ñiah ar shaka khlem biang ka laisen, kiba shim pass bad ñiah khlemakor da kaba pynher sted kaba buh ha ka jingma ïa ka jingim kiwei pat.
Kumta u SP u la kyntu ïa ki nongñiah ar shaka ban ñiah katkum ka rukom ban don ka jingshngaiñ ïalade bad ïa kiwei pat.
U la kyrpad ruh ïa ki kmie ki kpa ban tehlakam ïa ki khun khamtam ban pyrkhing ba kin nym ñiah kali ne ar shaka ki bym pat dei ka rta.
Ki ar shaka ki la buh jingma shisha namar ki don kiba ñiah katkum ka jingbiang maki katba ïa kiwei pat ka long ka jingma ïa ka jingim.
Ka jingñiah ïa ki ar shaka na ka liang ka bym dei ban ïaid ruh ka dei kaba buh jingma bha ïa kiba ïaid harud surok. Namar kata ki pulit ki hap ban pyrkhing ïa ka rukom ïaid ki ar shaka khamtam ha ki jaka ba khapngiah ha kaba la sakhi ïa ka jingpynher sted.
