Shillong, Naiwieng 15
U ksiang ka Hynñiewtrep National Liberation Council (HNLC), Bah Sadon K. Blah u la ong ba ka seng kam pat shim kano-kano ka rai halor ka jingkyrpad khot ïakren ka Sorkar Jylla ïa ki nongïalam ba hakhmat jong ka.
“Kim pat ai kano-kano ka rai, nga la dep kynjoh ktien sha ki hynnin,” ong u Bah Blah.
U la ïathuh ruh ba ïa mynta baroh ki dkhot ka seng kiba mihkhmat ha ka jingïakren ïasuk ki la leit phai noh shuwa sha Bangladesh.
Hashuwa, u Bah Blah u la ong ba ka jingiehnoh kam jong u Bah Manbhalang Jyrwa kum u Vice-Chairman ka HNLC kan ym ktah satia ïa ka jingïakren ïasuk ka seng bad ka kam kan tyllun beit shakhmat.
Kumban shu kdew hangne, ka Sorkar Jylla ka dang ap ïa ka jingai ktien na ka liang ka HNLC na ka bynta ban ïaid shakhmat bad ka jingïakren ïasuk.
U Symbud Myntri Rangbah ka Jylla, Bah Prestone Tynsong ha ka Sngi Ba-ar u la pyntip ba mynta ka Sorkar ka dang ap ïa ka jingai ktien na ka HNLC bad ruh ka la kyrpad ba ki nongïalam ba hakhmat ka seng ba kin wan noh dalade sha ka jingïakren ïasuk ban wan.
U Bah Prestone u la ong ba kumba ka long mynta, na ka liang ka Sorkar Kmie bad ka Sorkar Jylla ki long kloi beit ban bteng ïa ka jingïakren bad ka HNLC, bad mynta ka Sorkar ka dang ap ka jingai ktien na ka liang ka seng namar haduh mynta ki nongïalam ba ha khlieh duh jong ka kim pat wan satia ban ïashim bynta ha ka jingïalang ïakren ïasuk.
Halor katei, u la ong ba la phah leit phai noh shuwa ïa ki dkhot ka seng ha ryngkat ka jingkyrpad bad ka jingkyrpad ka Sorkar ka long ba ynda ki la long kiba la khreh ba kin sngewbha ban pyntip sha ka Sorkar, naba ka dang ap ban bteng biang ïa ka jingïakren.
Shuh shuh u Bah Prestone u la bynrap ba ka jingïakren ba pura ka dang long tang shisien bad ba katei ka jingïakren ruh ka dang dei tang bad ki dkhot ba kham hapoh ka kyrdan bad kumta ka Sorkar ka kyrpad ba ha ka jingïalang ban wan, la dei ban ïadon lang da ki nongïalam ba hakhliehduh, ban ïoh pynïaid shakhmat ïa ka jingïakren lyngba ka miej ïakren ïasuk.
