Nongstoiñ, Naiwieng 16
Ka long shisha ka jingsngewsih kthang ïa ki paid nongrep ha ki bynta jong ka West Khasi Hills kiba dang pynkhreh mynta ban lum ban lang ïa u kba kaba ki la ap kyrmen baroh shikatta ynda la dei ka aïom ot. Pynban da ka jingwan kynsan jong u slap ba jur ka la pynlong ka jingduh kaba khraw bad bijai ei ka jingtrei shitom.
Ïa kane la ïoh sakhi ha ka Sngi Palei jong ka taïew ha kaba ki nongrep kiba na ka shnong Tiehbah Nongstoiñ katba ki dang pynleit jingmut ha la ki lyngkha ban lum ban lang ïa u kba kyndit-kynsan u ‘lapbah u la wan bad baroh u kba uba ki dang ïa lum ki la shu per lut shajrong um bad shah rong noh artad.
Katkum ka khubor na ki nongrep kba la ïathuh ba katei ka jingjia ka la jia ha ki 2.00 baje eiei nohphai sngi hadien ba u ‘lapbah u la ther tyngeh, u kba uba dang shu dep ot bad uba la lum shi jaka ha kaba satang ban shoh noh la shu shah kit noh ha ka um.
Nalor kane, ka khubor ka ong ruh ba ka jingduhnong la shu antad ba uwei-uwei u trai pynthor u la duh palat ïa ka T.15,000 eiei. U kba uba la shah rong noh ha ka um ki kynthup jong u Bah Branli Marweiñ, Bah Tholing Kharlyngdoh, Kong Ispilian Mawlieh bad Eldaris Thongni bad kiwei kiwei ruh.
Na ka liang ki nongrep ki la pynpaw ruh ïa ka jingsngewdiaw kaba jur bad ki la kyntu jur ruh ïa ka sorkar lyngba ka tnat ka rep ka riang ba kan phai khmat lem halor ka jingduhnong jong ki kum ki nongrep.
