Shillong, Naiwieng 16
U Myntri Rangbah ka Jylla u Conrad K Sangma ha ka Sngi Palei u la pyntip ba na ka bynta ban ïaleh ban weng ïa ka jingkhapngiah ha ka ïaid ka ïeng ki kali ha nongbah Shillong, na ka liang jong ka sorkar ka la pynkhreh da ki 3 tylli ki Parking Lot ne jaka ïeng kali bathymmai ha nongbah Shillong.
Haba kren sha ki lad pathai khubor, u Conrad u la ong ba ki lynti ne rukom kiba donkam ban sdang ïa ki bun tylli ki jaka ïeng kali ki la dep ban sdang bad la khmih lynti ba ha kane ka Khristmas ne ha u bnai Kyllalyngkot jong u snem 2024, ka thaiñ Nan Polok kan sa don ïa ka jaka ïeng kali kaba thymmai.
Nalor kane, u Myntri Rangbah u la pyntip ruh ba hapoh ka nongbah bad thaiñ Secretariat, la dep ban ithuh ïa ki ar tylli ki jaka ha kaba yn sa tei ïa ki jaka pynïeng kali.
“Ynda kine ki jaka pynïeng kali kin don, kiba bun ki kali kin nym ïeng shuh harud surok bad ha kaba ki surok jong ngi kin sa long kiba kylluid bad ngi don ka jingkyrmen ba kum kine ki lynti kin sa ïalam ban lah pyllait na ka jingkhapngiah,” la ong u Conrad.
Ha kaba ïadei bad ki taksi bad bos kamai kiba ju ïeng slem ha ki thaiñ Motphran bad Khyndailad; kaba wanrah ïa ka jingkhapngiah bad dheng kali hapoh ka nongbah, u Myntri Rangbah u la pyntip ba na ka bynta kine ki kali paidbah yn sa pynbiang ïa ki jaka kiba biang.
Haba batai kham bniah ha kaba ïadei bad ka jingtyrwa ban don noh da ki lynti ïaid kjat na suiñ (skywalk) na Barik Point sha Khyndailad, u Myntri Rangbah u la ong ba ïa kane ka projek la hap ban pynsangeh shwa shipor hadien ba ka tnat pulit ka la kdew ba ka jingtrei ïa kane ka projek kan sa wanrah ka jingdheng kali kaba jur, kumta hap ban wad shwa da kiwei ki lad ki lynti ha shwa jong kane.
