Aizawl, Naiwieng 16 (UNI)
Wat hapdeng ka jingkyntu jong ki seng saiñpyrthei, sengbhalang bad ki Balang ha Mizoram, ka Election Commission of India (ECI) ka la rai ban ym pynkynriah ïa ka sngi ñiew ‘vote’ ha ka ilekshon sha ka Ïingdorbar Thawaiñ, la ong u Chief Electoral Officer, u Madhup Vyas ha ka Sngi Palei.
U Vyas, uba la wanphai sha Mizoram na Delhi ha ka Sngi Balang hadien ba u la ïakren bad ki bor jong ka Election Commission, u la ong, “Ka jingñiew ‘vote’ kan long beit ha ka 3 tarik Nohprah katkum ba la pynbeit da ka ECI.”
Ka 3 tarik Nohprah ka dei ka Sngi U Blei bad namarkata, ki kynhun bapher-bapher ha Mizoram ki la kyntu ïa ka ECI ban pynkynriah noh ïa ka jingñiew ‘vote’ sha kawei pat ka sngi.
Kham hashwa, u CEO u la pynpaw ïa ka jingkyrmen ba ka ECI ka lah ban pynkylla ïa ka sngi ñiew ‘vote’ hadien ba ka NGO Coordination Committee, kaba dei ka kynhun synrop ki sengbhalang bad seng samla pule, ka la ïakynduh ïa u.
Ha kawei pat ka liang, ka jingïalang jong ka Central Committee ka Young Mizo Association kaba la long ha ka Sngi Palei ka la rai ban nang buddien ïa katei ka kam hadien ba ka la dep pynlong ïa ka jingïamir jingmut bad ka NGO Coordination Committee.
U nongïalam ka YMA u la ong ba ïa ka lynti ba shakhmat yn sa shim khnang ban pynbor ban pynkylla ïa ka tarik ban ñiew ‘vote’.
Ka kynhun ki Balang ha Mizoram ba la tip kum ka Mizoram Kohhran Hruaitute Committee (MKHC), kaba la ai da ka jingthoh sha ka ECI, ka la ong ba ki nongïalam ki Balang ki la ieh ha ka NGO Coordination Committee ban shim ïa ki rai aïu ban leh nangne shakhmat halor katei ka mat.
Baroh ki seng saiñpyrthei ba kynthup ïa ka Mizo National Front (MNF) bad ka BJP ki la thoh sha ka ECI ban pynkynriah ïa ka tarik ñiew ‘vote’ namarba ka 3 tarik Nohprah ka hap ha ka Sngi U Blei kaba dei ka sngi ba la ñiew kyntang da ki Khristan kiba don ha Mizoram.
Ka NGOCC, MHKC bad ka Mizoram People’s Forum (MPF), kaba dei ka shnat jong ka Balang, ki la dep ban ai ïa kiba bun ki jingthoh sha ka ECI ban pynkynriah ïa ka sngi ñiew ‘vote’ sha ka 4 lane 5 tarik Nohprah.
