Shillong, Naiwieng 16
Ka Kynhun Myntri ka la ai jingmynjur ban pyndonkam noh da ki kot pule kiba pynmih da ka National Council of Educational Research and Training (NCERT) ym shuh da ki kot kiba pynmih da ka Meghalaya Board of School Education (MBOSE) na ka bynta ki khynnah klas-I haduh klas-X.
Kine ki kot yn sdang pyndonkam naduh ka samoi ai jinghikai ka ban sa wan.
Hadien ka jingïalang ka Kynhun Myntri ha ka Sngi Palei, u Myntri Rangbah u Conrad K Sangma u la ong ba ïa ki kot pule ka NCERT yn sdang pyndonkam ha ki lai tylli ki sobjek kiba kynthup ïa ka English, Mathematics bad Science.
U Conrad u la ong ba na ka bynta ki Klas-I haduh Klas- V, kan don ka jingpynkylla ïa kito ki kot pule sha ka ktien lajong namar ki don ki skul kiba ka rukom ai jinghikai ka dei ha ka ktien lajong.
U Conrad u la ong ba kane ka jingleh ka dei namar ka jingsngewkhia ïa ka jinglong jingman ka pule puthi ha kaba la don ka jingïasyllok bad wad bniah haba ïadei bad ki kot pule ha kaba la lap ba ki kot pule ka MBOSE kim pat kot sha ka kyrdan kaba long kum ha ka ri baroh kawei.
U la ong ba kane ka sienjam ka long ban kan kham pynbha ïa ka pule puthi bad saiñdur ïa ki lynnong ha ryngkat ka thong jong ka Sorkar ka long ban lah ban pyndonkam ïa ka rukom thoh ka pule.
