Shillong, Naiwieng 16
Ka long shisha ka khubor kaba pynkyndit ban tip ba ki khatar tylli ki longïing ha ka shnong Lower Mawpud kaba hap ha Ranikor konstitwensi, South West Khasi Hills District kim banse ban leit tan na ka um kaba don na paiñkhana jong ka ïingmane Presbyterian Lower Mawpud tang namar ba ka tnat sam um jong ka sorkar jylla kam shym la lah ban pynpoi um sha kine ki longïing kaba la pyntrei na ka Jal Jeevan Mission (JJM) kaba dei ka skhim pynïoh um jong ka Sorkar India.
Katkum ka jingleit wad jingtip ki nongïalam shnong na ka shlem treikam Public Health Engineering (PHE) jong ka Sorkar Jylla kaba don ïa ka jaka treikam jong u Executive Engineer ha Mawkyrwat ba na kane ka skhim JJM la buh thong ban pynpoi um sha 145 tylli ki longïing jong kane ka shnong. Hynrei hadien ba u kontraktor u la dep sei lut ïa ka pisa, ki 50 tylli ki longïing kim shym la ïoh um kat haduh mynta.
Kumta ki 12 tylli ki longïing kiba don marjan bad ka ïingmane Presbyterian Lower Mawpud ki la hap ban pan jingïarap na ki nongïalam Balang ba kin shah ban tan ïa ka um kaba don ha paiñkhana khnang ba kin ïoh ban dih bad pyndonkam ha ïing, katba kiwei pat ki bym ïoh um ki hap ban leit tong na ki wahduid kaba ki hap ban shu ïaid da ka kjat.
Ki nongïalam shnong hapoh ka jingïalam u Myntri bathymmai u Bah Robertson S Basan haba ki la ïoh jingtip ba u kontraktor u la dep sei ïa ka pisa na ka skhim JJM bad sei ruh ïa ka ‘call deficit’ na ka shlem treikam PHE kaba u la thep ïa ka 5 percent kim shym la don lad shuh hynrei satang ban pynpaw pyrthei lyngba ki lad pathai khubor ban kyrpad ïa ka shlem treikam PHE ba kan phah trei biang ban pynpoi um sha kine ki 50 tylli ki longïing ki bym pat ïoh um.
Kumta mynta ka sngi ka 16 tarik Naiwieng 2023 ka shnong ka la lum ïa ka dorbar kyrpang ban leit jurip ïa ka top um jong ka PHE kaba rim bad ka top um jong ka JJM, ïa ki pipe kiba la poi um sha ïing bad ïakynduh ïa ki trai ïing ki bym shym la poi um.
Haba ïoh ban ïakren bad u Myntri ka Lower Mawpud, Bah Robertson S Basan, u la ïathuh ba u kontraktor u la shu wanrah tang ïa ki pipe ban tan na ka tyllong um kaba rim ba la shna da ka PHE ban pynpoi sha ka top um ka barim jong ka PHE kaba don hapoh shnong ban pynpoi biang sha kawei ka top kaba u la shna na ka skhim JJM ban sam um sha ki 95 tylli ïing katba 50 tylli pat kim shym la poi.
U la ïathuh biang ba kine ki 50 tylli ki ïing ki bym ïoh um ka la ktah ïa ka kamai kajih namar ki hap ban leit tong um bad ki kynthei lei don ka por ba ki ïania para kynthei namar ki kwah ban tong nyngkong.
Shuh shuh u la ïathuh ba ha kaba nyngkong u Myntri barim jong ka shnong u la pyntip ba ka skhim JJM ka poi shi klur sanphew lak hadien pat la ïoh jingtip ba ka poi tang 60 lak. Kumta ka shnong tang ban ïoh ïa ka jingtip ba shisha ka la dep pan jingtip da ka Right to Information na ka shlem treikam PHE ha Mawkyrwat.
U la ong ba kaba pynkulmar ïa ki nongshong shnong ka dei hadien ba ka shlem treikam jong ka PHE ka la pyllait lut ïa ka pisa sha u kontraktor bad ïa ka ‘call deficit’ la dep pyllait hadien ba la pyni ba la dep ka kam kaba poi lai lak laiphew hajar tyngka hynrei u Myntri barim u la sei noh ïa ka pisa kaba lai lak tyngka bad buh ha ka shnong tang laiphew hajar tyngka.
Nalor kata, u Bah Robertson u la ong ba nalor ki pipe u la pyndait da ki barim bad ka top ka barim kan ktah ïa ka koit ka khiah lada ki longïing ki dih ïa ka um namar ka skhim JJM ka la mang pisa ban shna da ki pipe um kiba thymmai.
“Ka long shisha kaba ktah ïa kito ki longïing kiba la hap ban leit tan ïa ka um na paiñkhana jong ka Balang Presbyterian Lower Mawpud namar kim banse haba kim ïoh um na ka skhim JJM” u la ong.
Nangta shuh shuh u la ong ba lada don ka jingïaseng kaba heh, kine 12 tylli ïing kin nym ïoh um namar ka Balang ka hap ban pynbiang shwa ïa kiba wan jingïaseng, hynrei ha ki bym don jingïaseng heh la shah kylluid ïa kine ki longïing ba kin tan.
