Jowai, Naiwieng 16
Ki pulit jong ka East Jaiñtia Hills ha ka Sngi Balang ki la ïoh ban kem noh ïa ar ngut ki briew ryngkat u drok heroin uba don ka jingkhia 21 gram bad 1.03 gram.
Kine kiba shah kem ki dei kiba la tip kyrteng kum u Manoj Muksor, 23 snem rta bad u Vicky Dkhar, 26 snem rta.
Katkum ka khubor na ki pulit la ïathuh ba ha ka 15 tarik Naiwieng, ki pulit ki la ïoh ka jingtip kaba thikna ba u Manoj Muksor uba wan na ka thaiñ Silchar bad kiew sha ka thaiñ Khliehriat u la wanrah lang ïa ki jingdih beaiñ.
Hadien kane, ki pulit ki la pynlong ka jingpynap shrip ha ka shnong Nongsning kaba don ha surok bah NH6 ban pynlong ka jingtalasi ïa baroh ki kali kiba wan na ka thaiñ Lumshnong.
Dei ha ka por kumba 5.30 janmiet ki la ïoh bat ïa kawei ka taksi kamai kaba don ïa u Registration Number ML11-3594 kaba shong da ar ngut ki briew ryngkat u nongñiah. Ha ka jingtohkit la shem ba uwei na kine ki nongshong kali u dei u suba donkti ha ka kam khaïi drok.
Haba la pynlong ïa ka jingtalasi ha ka jingïadon lang ki sakhi ba laitluid, la lap 2 tylli ki synduk sabon na ka pla jong u Manoj bad lap ruh ïa u kynja powder stem uba don ka jingkhia kaba 21 gram. Ha ka jingtalasi ïa u Vicky Dkhar la lap ïa 34 tylli ki bilor rit kiba don ïa une ujuh u powder uba khia 1.03 gram bad ha ka jingpeit bniah la pynshisha ba u dei heroin.
Halor kane, ki pulit ki la kem noh ïa ki na ka bynta ban pynlong shuh shuh ïa ka jingtohkit. Na kine ar ngut ki pulit ki la ïoh ban kurup noh ïa artylli ki mobile phone kynthup ïa ki artylli ki pla.
