Nongstoiñ, Naiwieng:
Ka jingkieng kaba don hapoh ka shnong Mawkaton ha West Khasi Hills kaba pynïasoh ruh ïa ka surok Mawkaton-Nongstoiñ ka la sdang ban pei thliew bad jot ha ki bynta jong ka jingkieng.
Ha kaba ïadei bad kane, ka HYC Lai Lyngdoh Circle ha ka 14 tarik mynta u bnai hapoh ka jingïalam u samla Wandap Marweiñ kum President bad u samla Willberthsoon Kharsyiemlieh kum General Secretary ryngkat ki dkhot, ka la ïoh ban leit ïakynduh ïa u Executive Engineer ka PWD (Roads), Nongstoiñ Bah S Massar ban ïakren bad kyntu ban maramot noh ïa katei ka jingkieng.
U samla Wilberthsoon Kharsyiemlieh u la ong ba nalor ka jingnang jot jong katei ka jingkieng, ka HYC ka la lap ruh ba ka surok Mawkaton-Nongstoiñ ka la nang sniew ha kaba ka la donkam ban maramot ban pynbha khnang ban lait na ka jingduh nong ïa ki paid nongshong shnong ha kitei ki thaiñ kiba pyndonkam ïa ka jingkieng bad katei surok ka la sniew shaba palat.
Shuh shuh u la ong ruh ba ha ka jingleit ban ïakynduh bad ïakren ka HYC, na ka liang u Executive Engineer u la kular ban phai khmat ïa kitei ki mat bad ban pynbha noh kloi-kloi ïa katei ka jingkieng bad ïa ka surok ruh kin sa thaw lad kham kloi.
