Jowai, Naiwieng 16
U Waheh Shnong ka Moodymmai, West Jaiñtia Hills District u Bah Joseph Pariat u la pynshai sha ki nongshong shnong ba ïa ka pisa jong ka shnong ka dei sa tang ban bate ne bhah noh khnang ban ïoh jingmyntoi ki paid nongshong shnong katkum ka hok jong ki.
Kane ka jingpynshai ka la wan hadien ba ki nongshong shnong ka Moodymmai ki la kynnoh ba ka rukom treikam jong u Waheh Shnong ha kaba ïadei bad ka kam pisa pilaiñ ka long ka bym shai.
U Waheh Shnong u la pynshai ba ka jingbym lah ban bate ïa ka pisa jong ka shnong ka dei namar ka jingshah khang ki dkhot ka Executive Committee ban rung sha ïing dorbar ban pynlong ïa ka jingïalang pyrkhat kam.
U la ïathuh ba ha ka 10 tarik Naiwieng, ki dkhot ka Executive Committee jong ka Dorbar Shnong Moodymmai ki thmu ban pynlong ïa ka jingïalang pyrkhat kam ha ïing dorbar hall jong ka shnong na ka bynta ban pyrkhat kumno ban bate bad pyntreikam ïa ka pisa shnong bad kiwei kiwei de ki mat kiba ïadei bad ka jingbha jingmiat jong ka shnong.
Hynrei ynda u Waheh Shnong bad ka EC ki la poi ha ïing dorbar, katto katne ki paid nongshong shnong kim ailad ïa ki ban pynlong ïa kane ka jingïalang ka Executive Committee, la pynshai u Waheh Shnong.
U Bah Pariat u la kyrpad ïa ki longkmie longkpa bad ki ‘riew rangbah jong ka shnong Moodymmai ban ai ka jingïatreilang. Nangta u la kyrpad ruh ïa ki kmie ki kpa ban kyntu kyrpang ruh ïa ki khun ki kti jong ki ban kiar na ka jingkren ki bym sngewtynnad kiba lah ban ktah mat-ïong ïa ka jingim jong u shimet bad ïa ka longïing longsem.
