Shillong, Naiwieng 16
Ka Embassy of Japan, New Delhi, Japan Foundation, New Delhi ha ryngkat ka jingïatreilang bad ka Indian Council For Cultural Relations (ICCR), North East kan sa pynlong ïa ka North East Japan Caravan 2023 ha ki lai sngi lynter kata naduh ka 17 tarik haduh ka 19 tarik u bnai Naiwieng 2023 ha U Soso Tham Auditorium ka ban sdang ha ka por 3 baje janmiet.
Ka jingpynlong ïa katei ka prokram ka long kum shibynta ban pyninam ïa ka riti ka dustur bad ka lariti jong ki nong Japan ha ka jingkynthup lang ïa ki samla nongshong shnong.
Ki nongpynïaid na Japan kiba la wan poi ha nongbah Shillong ki kynthup ïa ka Maho Hakamata bad ka Yosuke Nakada kiba dei napoh Japan Embassy bad ka Aoi Ishimaru bad ka Keiko Yoshikawa kiba dei na ka Japan Foundation, New Delhi.
Haba kren sha ki lad pathai khubor ha ka Sngi Palei, u N. Munish Sing, Zonal Director, u la ong ba ka jingpynlong ïa kane ka ‘Caravan’ ka long ban pyninam ïa ki riti ki dustur bad ki kolshor jong ki nong Japan.
“Kane ka dei kabu ban pyninam ïa ka kolshor bad ka lariti jong ki nong Japan kiba ki don bad ba ki khun samla kin don bynta lang ha ki ki kolshor jong ki nong Japan”, la ong u Sing.
U N. Munish Sing u la ong ba ka jingjied jong ki ban pynlong ïa katei ka Caravan ha Shillong ka dei namar ba ka Shillong ka dei kaba don lut ki jaitbynriew bapher bapher bad ka dei ruh ka jaka kaba itynnad bad ki briew ruh ki long kiba sngewtynnad.
“Hapoh Shillong ngin lap ïa baroh ki jaitbynriew jong ka Ri India, ka dei ka jaka kaba itynnad bad ki briew kiba sngewtynnad bad ka dei ka jaka kaba sngewtynnad ban leh kum kine ki jait prokram kolshor bad kumjuh ka dei ka jaka kaba jai jai”, la ong u Sing.
Ha katei ka sngi, ka Dr Mazel Ampareen Lyngdoh kan long kum ka kongsan ha ryngkat ka jingïadonlang u Satoshi Suzuki, uba dei u nongrah ktien jong ka Japan sha India.
Ha ka sngi kaba sdang kata ha ka Sngi Thohdieng kan don ka jingpyni bad ka jingpynhikai ïa ki rukom leh Judo bad Karate, ka jingpyni phlim Anime. Katba ha ka sngi kaba ar pat, kan don ka jingpynithuh ïa ka kolshor jong ki Japan da kaba pynlong ïa ki jingïalehkai bapher bapher, ka jingpyninam ïa ki riam ki beit lane ka ‘Cosplay’ bad ha ka sngi kaba lai pat kan sa don ki jingïalehkai bapher bapher, ka jingpyni ïa ki phlim ‘Anime’, ka jingïakob dro dur bad kiwei kiwei.
