Shillong Naiwieng 16
U Myntri Rangbah ka Jylla u Conrad K Sangma ha ka Sngi Palei u la pyntip ba ki kam kiba ïadei na ka bynta ban pynlong ïa ka ilekshon MDC ha u snem ban wan ki la ïaid shakhmat.
Lah ban pynpaw ba ka ilekshon MDC sha ka ïingdorbar jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) kan long ha u snem ban wan. Ki don khubor kiba la saphriang ba lah ban pynjlan shwa shipor ïa ka samoi treikam namar ba lah ban don ka jingpynkylla ha ki kyndon ka Khyrnit Hynriew.
Haba kren sha ki lad pathai khubor ha ka Sngi Palei na ka liang u Conrad K Sangma u la ong, “Ki kam ki jam ki la ïaid shakhmat bad ngi la ïaid katkum ka lynti kaba dei ban ïaid, kumta ngin sa peit haba ngi ïoh ïa kano kano ka jingpyntip na ka tnat kaba dei khmih, ngin sa shim ïa ka rai ha kaba ïadei bad ka jingbuh ïa ki tarik bad kiwei kiwei.”
Ha kaba ïadei bad ka jingsaphriang ki khubor ba ka lah ban don ka jingpynjlan ïa ka ilekhson jong ka KHADC bad JHADC namar ka jingsahteng ban pynkylla ïa ki kyndon jong ka Khyrnit Hynriew jong ka riti synshar ka ri, u Myntri Rangbah u la ong, “Haduh mynta ngam pat ïoh jingtip eiei bad ruh ngam pat ïoh ïa kano kano ka jingthoh ruh bad dei tang ynda ngi la ïoh ïa ka jingthoh, kata sha nga bad sha u Myntri ka tnat District Council Affairs, ha kaba ngin sa lah ban kren eiei.”
