New Delhi, Naiwieng 16
Ka UCO Bank ka la pynbna ba ka la kum bakla ban phah haduh T. 820 klur sha ki briew kiba don ‘Account’ bad ka, bad na kane, ka la ïoh biang T. 649 klur.
Ka jingphah bakla ïa katei ka pisa sha ki katto katne ki ‘Account’ ka long lyngba ka Immediate Payment Service (IMPS). Hynrei da kaba shim ïa kiba bun tylli ki sienjam, kane ka Bank ka la khang ïa ki ‘Account’ jong kito ki briew kiba la ïoh pdiang ïa ka bynta na katei ka pisa bad namarkata, ka la lah ban ïoh biang T. 649 klur na ka TT. 820 klur lane 79 per cent. Kane ka la paw ha ka jingthoh ba la ai da ka UCO Bank.
Hynrei ka UCO Bank ka khlem pat lah ban pynshai la ka jingbakla ban phah ïa katei ka pisa ka dei na ka jingleh bakla jong ki nongtrei lane na ka daw jong ka jingshah pyndonkam bakla ki kor ki bor ha kiwei pat lane ‘Hacking’. Lah ban kdew ba ïa ka rynsan IMPS la pyntreikam da ka National Payments Corporation of India (NPCI). Lada phah pisa lyngba ka IMPS, tang katto katne por, la ïoh ban pdiang ïa ka pisa khlem kano-kano ka jingthut.
Na ka liang ka UCO Bank ka la nang shim shuh ïa ki sienjam ban ïoh biang sa ïa ka pisa kaba dang sah, kata, T. 171 klur, bad ïa kane ka jingjia, la pyntip sha ki bor jong ka aiñ khnang ba kin leh ïa kaba donkam.
Naduh ka 10 tarik haduh ka 13 tarik Naiwieng, ka UCO Bank ka la ïohi ba na ka daw ka jingthut ha ka IMPS, ki la don ki briew kiba don ‘Account’ ha kiwei pat ki Bank ki la phah pisa sha ki briew kiba don ‘Account’ bad ka UCO Bank, hynrei ym shym la ïoh pisa satia pat na kita ki Bank kiba la pyndonkam da ki briew ban phah ïa ka pisa.
