Shillong, Naiwieng:
Sa tang shisngi ba ka sorkar jylla kan sa pynlong ïa ka tamasa Cherry Blossom ka ban sdang ha ka 17 tarik mynta u Naiwieng bad kut ha ka 19 tarik jong ujuh u bnai. Ha katei ka tamasa ki nongtem bad ki nongrwai ba pawnam na kylleng ka pyrthei kin sa wan ban ïashimbynta bad pynshongshit ïa ki paidbah ha kitei ki lai sngi lynter hapoh ka Madan Kurkalang ha Bhoirymbong.
Ka kynhun rwai bad tem ïa kaba la tip kum ka SURL ka dei ka kynhun kaba dei ban don bynta ha katei ka tamasa bad ka dei ban tem ha ka sngi sdang jong katei ka tamasa kata ka 17 tarik mynta u bnai hynrei na ki daw bym lah kiar ka la pynsangeh noh ban wan.
Ka SURL lyngba ka sla ‘Instagram’ lajong, ka la pyntip paidbah ba katei ka kynhun kan nym wan tem shuh ha katei ka tamasa namar ki katto katne ki daw kiba la pynthut ïa ka jingpynkhreh jong ki ban wan ïashimbynta ha katei ka tamasa namar ba ka dei ka por ba ki paidbah ka ri India ki don ïa ki jingleh kmen bapher bapher bad ka jingïoh shuti jong ka sorkar. Kumta ki khmih lynti bad ki rukom ba dei ban leh ym lah satia ban leh ha ka por kaba biang.
Ha katei ka sla ‘Instagram’ ka kynhun SURL ka la ong ba watla na ka liang jong ki, ki la ïaleh ban leh katba lah ban don bynta ha katei ka tamasa hynrei ka long pat kaba sngewsih ba kim lah satia ban leh eiei, kumta ki la hap ban pynsangeh noh ban wan.
Shuh shuh ka kynhun ka la panmap na ki nongkyrshan jong ka kiba la ïai ap khmih lynti ïa ka kynhun SURL ban wan tem ha ka sien kaba nyngkong eh hapoh Ri India bad ki la ong ba ki ngeit skhem ba kin sa don bynta ha ki por ki ban sa wan ha ka por kaba biang.
“Ngi panmap shikatdei eh na ki nongkyrshan kiba la ïai ap khmih lynti ïa ka SURL ban wan tem ha ka sien kaba nyngkong eh hapoh ka Ri India. Ngi kyrmen ba ngin sa lah ban don bynta ha ka por kaba biang ha ki por ban sa wan”, la ong katei ka jingthoh jong ka SURL.
