Shillong, Naiwieng 16
Baroh ki briew haba ki la ïoh ïa ka kam ki kwah ban trei kham bha ban kiew kyrdan bad kiew ka tulop, hynrei u Bah Pyndaplang Muksor uba dei na ka shnong Iooksi u la iehnoh ïa ka kam pulit ha ka Meghalaya Police 5th Battalion namar u kwah ban seng da ka jaka ai jinghikai ban long kum ki nongap pahara ban ai kam ïa ki samla.
U Bah Pyndaplang u la rung sha ka kam pulit ha u snem 2008 bad iehnoh pat ha u snem 2021 da kaba seng ïa ka jaka ai jinghikai kaba la tip kum ka Sub Centre Training Tornado Security Agency kaba don ha Iooksi, Umdeinlin, West Jaiñtia Hills District kaba hap ha Mowkaiaw konstitwensi.
Une u samla rangbah u dei u rangïalehkai phutbol jong ka jylla ha u snem 1998 haduh 2008. Ynda haba u la ïoh ban rung ha ka kam pulit u la ngat khambun ki jaka dei kum ha rilum Garo ha ka por ba ka dang khlaiñ bha ka seng lehnoh GNLA.
Haba ïakren bad u Bah Pyndap Muksor u la ïathuh hadien ba u la iehnoh ïa ka kam pulit u la kwah ban seng da ka jaka ai jinghikai ban pynlong ïa ki samla kiba khlem kam khlem jam ba kin nym ngop ha ki jingdih pynbuaid.
“Ha ka por ba nga ieh ïa ka kam pulit nga trei khatduh ha Resubelpara ha u snem 2021” u la ong.
U la ïathuh ruh ba kane ka jaka ai jinghikai ka la ïaid mynta la lai snem ha kaba palat hajar ngut ki la dep shah hikai.
U la pynpaw ka jingsngewkmen ba ki samla kiba wan shah hikai ki wan na kylleng ka Bri U Hynñiewtrep namar ha ka shi kynhun ki don kiba poi 50 ngut haduh 70 ngut ban shah hikai hapoh 45 sngi.
“Ngam lah ban kular ba hadien ba la dep shah hikai ba kin ïoh kam beit hynrei shisien ba phi la ïoh ban bat ïa ka wait ha ka kti kata kaba mut haba phi la ïoh ïa ka syrnot ha kti ka shong ha ka jingstad jong phi ban wad kam” u la ong.
U la ong biang ba don ki samla kiba la dep shah hikai haba don ki kompani ne ki dukan ne ki hospital ne ki riewshimet ki donkam nongap pahara u la ïarap ban ïakren.
Ha kajuh ka por u la batai ba ka jingwanrah ïa kane ka jaka ai jinghikai sha Iooksi ka long ban suk ïa ki khynnah ba kin sah beit shi jaka hynrei da pynlong ha jaka sor kan ktah ïa ki khynnah namar ki hap ban wad ïing wai.
Nangta u la pyntip shuh shuh ba ka jingshah hikai ka ban sa long shen lada don kino-kino kiba kwah ban wan shah hikai kin sa phone ïa u ha une number phone 8787782592.
