Jowai, Naiwieng:
U Myntri ka tnat Cooperation ka Sorkar Jylla, Bah Comingone Ymbon u la plie ïa ka jingrakhe “70th All India Cooperative Week” ha ka jingïalang kaba la long ha Moosyiem Shangpung, West Jaiñtia Hills District ha ka 14 tarik Naiwieng.
Ïa kane ka jingïalang la pynlong da ka tnat Cooperation ha ryngkat ka jingïatreilang bad ka Meghalaya Cooperative Apex Bank Ltd, Rural Finance Shillong, bad Meghalaya Livelihoods and Access to Markets Projects (Megha-LAMP) of Meghalaya Basin Management Agency (MBMA).
Ïa kane ka jingrakhe ba la pynlong halor ka phang “Role of Cooperative Marketing in India: A five trillion Dollar Economy and Sustainable Development Goals, bad ka jingïamir jingmut ba kongsan ka long halor ka phang “Recent Developments in Cooperatives.”
Haba kren ha ka jingïalang, u Bah Comingone Ymbon u la kyntu khamtam ïa ki samla ba ki dei ban phaikhmat sha ki kam lajong na ka bynta ban kyntiew ïa ka ïoh ka kot bad ka roi ka par bad u la pynpaw ruh halor ka jingkongsan ban pynkhlaiñ ïa ki kam ïatreilang na ka bynta ban kyntiew ïa ka ïoh ka kot bad ka roi ka par.
Shuh shuh u la kyntu ruh ïa ki dkhot ba kin ïashim bynta shitrhem na ka bynta ban pyntreikam bha ïa ki projek ba la kyrshan da ka sorkar ban ai mynsiem na ka bynta ban long ki nongseng kam seng jam lajong. Nalor kata, u Myntri u la pynshlur ruh ïa ki kmie ki kpa kumjuh ïa ki samla wad kam wad jam ba kin pynleit jingmut sha ki kam lajong ha ka jaka jong ki kam sorkar.
Haba kdew halor ki sienjam lyngba ka jingpyntreikam ïa ka skhim CM Elevate, u Myntri u pyntip sha ki nongwan ïashim bynta halor ki lad ki kabu na ka bynta ki nongseng kam lajong halor ki skhim bapher bapher kiba aijingkyrshan ban kyntiew ha ki kam jngohkai pyrthei, ka rep ka riang bad ha kiwei kiwei pat ki bynta.
Ha kane ka sngi la ïadon lang ruh u Bah W K Kharbuli, Additional Deputy Commissioner, West Jaiñtia Hills, Kong R C Sohkhlet Registrar Cooperative Societies, MD Meghalaya Cooperative Apex Bank, ki ophisar na ka tnad Cooperation, Megha- LAMP, MBMA bad Meghalaya Cooperative Apex Bank Ltd bad kiwei kiwei.
