Shillong, Naiwieng 16
Ka Joint Action Committee (JAC) jong ka NEHUTA, NEHUNSA bad NEHUSU ha ka Sngi Palei ka la rai ban pynsangeh noh shwa shipor ïa ka jingïakhih ba khlem pud sngi hadien ba u Vice Chancellor (VC) ka NEHU u Prof. PS Shukla u la pan por haduh san sngi ban peit halor ki mat jingdawa ba kynthup ruh ka jingweng noh ïa u Technical Officer/Senior Consultant.
Hadien ka jingïalang bad u VC, u Chairman ka JAC u Prof. Lakhon Kma u la ong, “Ngi la rai ban pynsangeh noh shwa shipor ïa ka jingïakhih ka jong ngi bad naduh lashai ka sngi ka 17 tarik ki klas kin sdang biang, ki nonghikai kin sdang ban ai jinghikai bad ruh kiwei ki lah ban leit phai biang sha ki ophis treikam ki jong ki.”
U Prof. Kma u la ong ba ïa kane ka rai la shim hadien ba u VC u la kyrpad ban ai por san sngi na ka bynta ba un khmih halor kine ki mat jingdawa ba la buh da ka JAC kaba kynthup ruh ka jingweng kam noh ïa u Rohit Prasad kum u Technical Officer/Senior Consultant jong kane ka skulbah.
Shuh shuh u Prof. Kma u la pyntip ruh ba u VC u la mynjur ban thaw ïa ka komiti ka ban khmih bniah ïa ki mat kiba ïadei bad kane ka kam.
Ha kajuh ka por u Prof. Kma u la ïathuh ba ha ka jingïalang, u VC u la pyntip ba u Technical Consultant u Rohit Prasad u khlem don hapoh ka NEHU mynta la 15 sngi bad dei namar kane, ka NEHU kam donkam shuh ïa u Rohit ban don hapoh ka skulbah.
U Prof. Kma u la ong ba ka jingweng shwa shipor ïa ka jingïakhih kam mut ba la pynkut noh ïa ka jingïakhih hynrei ka dei ban ai por ïa u VC ba un khot ïa ka jingïalang jong ka Academic Council (AC) ka ban long ha ka taïew ba nyngkong u Nohprah.
Ha kaba ïadei bad kiwei ki jingdawa, u Prof. Kma u la pyntip ba na ka liang u VC u la kular ban thaw da ki committee bapher bapher na ka bynta ban pynurlong ïa ka jingdawa khmih biang ïa ka Educationally Backward Area Quota, ka Marking System ki samla pule bad ban thungkam kum ïa ki Statutory Officers bad ki Engineer ka University.
“Na ka bynta ban ïathir bad ban shim rai khatduh halor kine ki jingdawa, u VC u la kular ruh ban khot da ka jingïalang jong ka Academic Council (AC) ka NEHU ha u Nohprah,” la ong u Prof Kma.
