Shillong, Naiwieng 16
U Myntri Rangbah ka jylla u Conrad K Sangma u la pyntip ba ka Sorkar kan dang hap ban khmih bniah bha kumno ban pynlong ïa ka ktien Khasi bad Garo kum ki ‘Official Language’ ne ktien sorkar jong ka jylla Meghalaya namar ka jingeh kan mih ha kaba ïadei bad ka jingthoh ïa ki kot ki sla sorkar (file noting).
Lah ban pynkynmaw na ka liang jong ka Khasi Author’s Society (KAS) bad kumjuh na ka Hynñiewtrep Achik National Movement (HANM) ki la dep ban dawa na ka Sorkar ba dei ban ithuh noh ïa ka ktien Khasi bad Garo kum ki Official Language jong ka jylla Meghalaya khnang ban nang lah pynkhlaiñ ïa ka jingdawa pynrung ïa kine ki ktien ha ka Khyrnit Phra ka riti synshar ka ri.
Haba kren sha ki lad pathai khubor u Myntri Rangbah u la ong, “Ka mat ban pynlong Official Language kan shong ha ka jingbatai bniah ïa ka jingmut jong ka kyntien ‘Official Language’, kumta ngi hap ban khmih bniah bha namar ba kin don ki jingeh kiba ngin ïakynduh ha kaba ïadei bad ka jingthoh ïa ki kot ki sla ha ka kam sorkar”.
Shuh shuh u Conrad u la ong, “Lada ngi leh ha ka ktien Garo hato kane kan pynmih ne em ïa ka jingeh bad kumno ngin leh ïa kane lada jia ba u ophisar u dei uba kren Khasi bad English bad yn ym lah ban sngewthuh, ngin mad jingeh ha ka kam shakri paidbah.”
“Lada ka dei ka ‘Official Language’ kumno ngin weng ïa katei ka jingeh bad lada ngim pyndonkam ïa ka ktien Khasi bad Garo ha kane ka bynta hato kane kan pyndap pynbiang ïa kata ka jingmut ‘Official’. Dei namar kane ngi hap ban khmih bniah bha halor kitei ki bynta baroh khnang ba ngin lah ban shim ïa ka rai ban ïaid shakhmat,” u la ong.
Kumta khnang ba kan nym buh jingeh haba buh ïa ki jingthoh, kumta na ka liang jong ka sorkar ka donkam ban khmih bniah ha shwa ban shim ïa ka rai, namar kum ka sorkar ka kwah ba ka ktien Khasi bad Garo kin long ki Official Language jong ka jylla.
